tlul Taos Amrouche ass n 04 deg meɣres aseggas 1913 deg tmurt n Tunes. D tanaẓurt d tamyarut s tefransist. D nettat i tameṭṭut tamezwarut taqbaylit i yerẓan asalu n tira s ungal-is amezwaru s tefransist (Jacinthe noire, 1947), imi zik tameṭṭut ur tesɛi azref i wacemma.Taos Amrouche d yelli-s n Fadhma Ait Mansour d uletma-s n Jean Amrouche. Tcennu Taos tizlatin tiqburn s teqbaylit. Imawlan-is, d iqbayliyin, baba-s Belkacem Amrouche ( 1880-1958), yemma-s Fadhma Ait Mansour(1882-1967). Kkren-d deg Ighil Ali deg Bgayet, segmi i d-ilul Jean Amrouche aseggas n 1906, truḥ tawacult ɣer Tunes , sɛan lekwaɣeḍ n Fransa. Tewwi-d Taos Amrouche akayad n uswir alemmas, truḥ ɣer tmurt n Fransa. Tefka dinna azal i ccna n teqbaylit. Tura ungal amezwaru s tefransist «Jaceinthe noir», yeffeɣ-d aseggas n 1947. Ayen akk i texdem Taos Amrouche d yemma-s i as-ixedmen afud, tesselmed-as idles n tmaziɣt, tettales-as-d timucuha n leqbayel. Tetteki deg Ugraw Imaziɣen deg Fancsa aseggas 1966. Tessen Taos Amrouche aṭas n tullisin akked tmucuha i as-teḥka yemma-s. Tecna aṭas n tezlatin s ssut-is aḥlawan, yerna tesɛa tafulki , ar ass-a n wussan ‘’ulac’’ tameṭṭut i icennun am nettat. D tanazurt, ur tettun ara leqbayel yiwet tmeṭṭut am Taos Amrouche. Temmut deg 02 yebrir asseggas n 1976 deg Saint-Michel-L’observatoire. Isem-is ad yeqqim deg umezruy, ayen i d-teğğa ad yeqqim deg yidles, ad fell-as isuref wuzmir.
Ayen tura
– Jacinthe noire, 1947. (Ungal)
– Le Grain magique, 1966. (Ammud n tmucuha d tmedyazt)
– Rue des tambourins, 1969. (Ungal)
– L’Amant imaginaire, 1975. (Ungal, tameddurt-is)
– Solitude ma mère, 1995. (Ungal, mebɛed lmut-is)
Ayen icudden ɣer ccna
-Chants berbères de Kabylie, 1967.
-Chants de processions, méditations et danses sacrées berbères, 1967.
-Chants de l’Atlas, 1971.-Chants espagnols archaïques de la Alberca, 1972.
-Incantations, méditations et danses sacrées berbères, 1974.
-Chants berbères de la meule et du berceau, 1975.
Z.A.Y