Amezgun s tezwawt mačči d ayen i d-yettuɣalen s waṭas deg ttiɛadad neɣ deg tɣamsa. Mazal txus tfarest-ines (production) deg yal aḥric, ladɣa ɣur yilemẓiyen i yetturaǧun ad d-snulfun ugar deg tẓuri-ya, deg umaḍal-a n tsekla. Dɣa, ula d idlisen n umezgun s tutlayt n Lmulud n Ayt Mɛemmer ur d-teffɣen s ddeqs ma nga aserwes akked wammuden n tullisin, neɣ n tmedyezt, neɣ ulama n wungalen. Bab-as n tẓuriwin, akken i as-ssawalen, nezmer d tidet ad t-nesseqdec d allal n usneɣmes, n urebbi, n ussawki, lemmer ad as-nefk azal i ilaqen akken ad d-ineǧǧeɛ, ad yuɣal s annar n wallaɣen. Deg waya, ulac abrid i iwulmen ugar ala win n tdukkliwin ; d tineggura-ya i ilaq ad t-id-nejrent s lebɣi i yilemẓiyen akk i yessaramen ad ddmen asenfar i ttuɣ yeddem Muḥend Uyeḥya, awi-d ukan ad yettwarar umezgun s tutlayt tayemmat n mmi-s n yidurar. Dɣa, deg wassan n umezgan deg taẓrigt tis 7, ed iwakken ad muqlent i umezgun-a, ad rrent daɣen tajmilt i win i d-yesnulfan amezgun azwaw, heggant-d kra n tamiwin «arraz Muḥya n umezgun» d amsizwer n tmezgunt igerrzen s tezwawt i yilemẓiyen akked yimɣaren i d-yesnulfayen deg uḥric-a n tsekla. Wid iran ad kkin ilaq kan ad ssiwḍen akaram-nsen (dossier) ɣer Tmehla n Yidles n Tizi Wezzu, Axxam n Umezgun Kateb Yasin, neɣ ɣer Uxxam n Yidles Lmulud At Mɛemmer, aya send 31 deg wayyur-a n ṭuber. Ma yella d ttiɛad n temlilit ad yili seg 6 alama d 7 deg wayyur n duǧembr. I wugar n yisallen, qerrbet ɣer walbaɛḍ n yixxamen i d-nebder yakan.
Mhenni Xalifi