Qqaṛṛen zzman, kullec d nniya n wul, ma illa nniya teṣfa d tin i d lfayda, ma illa ur teṣfi ara, ulayγer iles γas issen amek ara ihder, akken iqqaṛ ccix Muḥend U Lḥusin:
« Laxeṛt ur teḥdağ ara aqezzeb. » Sidi Ṛebbi, iẓer γer wulawen, wama ayen nniḍen
ittwalmad.
Yiwen wass εeddan-d kra n yimnayen, di tmusni nsen d irgazen iselmaden, inehhun agdud γer ubrid n sidi Ṛebbi, ihi iṭṭef-iten lḥal deg yiḍ, rran γer yiwet n temγart nsan γur-s, testerḥeb yis-sen akken ilaq mi d-iwweḍ lawan n tẓallit, wallan-tt tekker tettẓalla, ttmuqulen-tt mi i teqqaṛ :-Mimuna tessen Ṛebbi, Ṛebbi issen Mimuna.
Tettεawad ala i wawal-agi, almi tekfa, inṭeq γur-s yiwen seg yimusnawen-nni:
-A Mimuna! Σiwed-d amek akken i s-teqqaṛṛeḍ mi i tettẓallaḍ.
Tenna-as qqaṛṛeγ-as: -Mimuna tessen Ṛebbi, Ṛebbi issen Mimuna.
Inna-as: -A la a Mimuna mačči akken ara tettẓallaḍ.
Tenna-as: -Amek ihi a mmi?
Inna-as: -Ad tbeddeḍ ad as-tiniḍ lḥemdu lillah Ṛebbi lεalamin, ad txedmeḍ akka, ad tettğaεleḍ akka…
Armi is-imla amek ilaq ad teẓẓal s leqṛan n tẓallit. Taṣebḥit kkren-d yimnayen beqqen-as sslam ruḥen.
Teqqim Mimuna weḥd-s, mi d-iwweḍ lawan n tẓallit tebγa ad d-tteẓẓal, maca iεeṛq-as wamek id as-iselmed umusnaw-nni iεeddan, si tama nniḍen tettu amek i tella zik tettẓalla.
Si zzεaf-nni tt-iγumen, sebba n tẓallit s-iruḥen, tedεa-as i umusnaw-nni: -A s-tent-isaεṛeq Ṛebbi i kra id iyi-tent-isεeṛqen.
Amusnaw-nni mi i iteddu d terbaεt-is, iḥulfa d yiman-is ur iskir ara, amzun irkeb-it kra, iεeṛq-as ccγel, ixeṛb-as ṛṛay.
Inṭeq γer imdukkal-is: -Ay atmaten aql-i ur lliγ ara bxiṛ ur iban acu i nexdem diri-t, neγ anwa ineḍlem aql-aγ nettxellis ddnub-is.
Nnan-as : -Ala ay amuqṛan siwa lxiṛ i nexdem, yerna ur tesεiḍ wi id-nemlal deg ubrid nneγ siwa tamγart-nni γur nensa.
Inṭeq umuqṛan: -Awah a nuγal alamma d γur-s, iban tetbeε-aneγ-d s wul-is.
Uγalen-d armi d tamγart-nni, mi ikecmen γur-s, inṭeq umuqṛan-nni:
-A yemma Mimuna, segmi neffeγ seg uxxam-im ur as-nufi ixef-is, nuggad ad yili illa deg wacu i kem-neḍlem?
Tenna-as: -Anεam a mmi illa.
Amuqṛan: -Deg wacu?
Mimuna: -Lliγ am rrbeḥ n Ṛebbi, ttẓallaγ ḥemdeγ Ṛebbi, akken id iyi-teslemdem amek ara ttẓalla&gamma,; ixereb-iyi kullec qqimeγ bγir taẓallit.
Amuqran: I lukan a k-m id-smektiγ taẓallit-im ad aγ-tsemmḥeḍ?
Mimuna: -Ad awen-semmḥeγ.
Amuqṛan: -Telliḍ ma tettẓallaḍ teqqarreḍ-as « Mimuna tessen Ṛebbi, Ṛebbi issen Mimuna. Tura a yemma semmeḥ-aγ u tẓalleḍ akken tessneḍ ad iqbel Ṛebbi fell-am, iqbel fell-a&gamma,; kullec d nniya.
Yeḥya Yanes. (Yahia Yanes)