Awal ar wawal, din timlilit. Drus yid-sen,maɛna lebɣi-nnsen meqqar. Wa d aqerru n tmacint, wa izerreɛ isallen, ma yeccelqaf-iten, wa yeṣṣawaḍ-iten ɣer iɛeggalen n terbaɛt izeggiren i llsas. Tiwwura llint i wid ak yettawin amezgun amaziɣ deg ulawen-nnsen, xas ur nnumen ara, xas d tikelt tamezwarut, d lawan ad rrẓen asalu. Yiwet n tiṭ di Lpari, tayeḍ di tmurt, win i d-yusan yeglu-yasen s cwiṭ deg wallen-is: da d taqerɛet n lgaz, da d tteṣwirat n yeɣyal i isellken aqbayli si nnger deg ideflawen iɛeddan. Samil, Rezki, Nunu, Samya, Mark…Facebook yeṣṣawaḍ, tizeɣwin n uheggi ṣṣawaḍent. Yal wa d acu i wumi i d-iɛewwel: wa d aɣyul n Ǧanǧis n Umeẓyan Kezzar, wa d tid n tlawin, wa d llakul n yeɣyal… d acqirrew! Yerna-yas-d sser kra din i d-ssemlalen, xas d tikelt tamezwarut, s ttawil n facebook, imi imdanen ttemyussanen s wul uqbel tiṭ, s tikti uqbel ṣṣura. Ussan snin-ten am uzrar, yal ass iɛeddan d aḥerkel, yal yiwen akken yezmer, awi-d kan ad tɛeddi akken ilaq, akka i d tafenṭazit, cwiṭ-nni d aṭas, itekkes ccyaḍ n yidles xeddmen medden seg ul. Leqdic imug-d am usaru, ṭṭafaren-t yemdukal, yal ass, ttḥiren ad d-yili wejdid, ad ɛelmen yis-s. Akken kan almi i d-yeḥder wass-nni urjan, tazeqqa teɛmer, lecɣal gerrzen, ulawen nnecraḥen, yegra-d kan ad refden iqerray-nnsen deg igenni ad sduklen iɣallen-nnsen i iseggasen i d-iteddun, lxir ar zdat!
Zira