Tettheyyi-d tesqamut n tmeɣriwin n temdint n Bgayet tiẓrigt tis 10 n tfaska n tezlit tamaziɣt ara yebdun ass n 04 deg wayyur n yulyu I d-iteddun. Tasqamut-a tessawel i yinaẓuren yebɣan ad kkin di temsizelt n ccna ara d-yilin ass n 4 yulyu ,wa ad d-cnun ayen ssnen ( cceɛbi, lfulklur ,ccna atrar …). Timsizelt-a ara d-yilin ad d-tas d umuli wis 50 n tmunent n tmurt-nneɣ. I wid yebɣan ad kkin aheyyi i tegnit-a yebda di 5 yunyu ad yekfu di 20 deg wayyur-a yakan . lekwaɣeḍ ara d-iɛemmer yiwen yezmer ad ten-yaf ɣer ssukritariya n tesqamut n tmeɣriwin n temdint n Bgayet. Inaẓuren yebɣan zemmren ad qerben, ulac tiwtilin ( les conditions): ur ttmuqulen ara leɛmer yerna win yebɣan ad d- yecnu uḥdes yezmer am wakken daɣen i zemmren ad d-cnun d tarbaɛt. Tameɣra-ya ara d-yilin ad tt-hdun ad yes daɣen ad rren tajmilt i lmerḥum Crif Xeddam. Tasqamut n tmeɣriwin n temdint n Bgayet, tewɛed ad texdem ayen akk i wumi tezmer akken ad d-teffeɣ tgerrez tfaska n useggas-a, yerna ad tili di lebɣi n wid ara iḥeḍren d wid ara yettekkin di temsizelt.
Soraya Rabia