Ataṣ akka n tɣiwanin i d-yezgan deg twilayt n Bgayet ttidirent deg waɣbel n waman n tissit. Yagi asmi ara ad d-yaweḍ weẓɣal, anda aman ttxaṣṣan aṭaṣ. Ibarbacen, d yiwwet akkeni n tɣiwant i yellan s kra n 35 ikilumiṭren ɣef Bgayet. Deg tɣiwant-agi igna mači dayen i xuṣṣen. Aman n tissit deg tama-agi d-aɣubel amuqran, imi xuṣṣen deg iqudas n tissit. Ɛla ḥsab imezdaɣ n tɣiwant-agi i d-yezgan deg yidurar n Lbabur, aman ttasen-d tikelt kan deg 5 n wussan. Yerna, aman-agi n tissit ttuɣalen-d deg yiqudas kra n swayeɛ kan deg 5 wussan ! Ayagi dayen ibanen ur yessefraḥ ara Ibarbacen, imi ɣas akken ttaččaren ibidunen wigi ur d-keffun ara i nnig n krad n wussan. Ayagi i demmer-iten akken ad d-aɣen iwumi nessawal aman n « les citernes » akken ad sxedmen aman i wayen ilaqen. Ama i tissit, i tarda (leqlul, tiɣerɣert, acucef,…)…Maca, « les citernes », tigi, imezdaɣ ttaɣent-ent-id ɣlayit: ger 1000 d 1200 idinaren ! Ayagi, mači akk imezdaɣ i yezemren ad d-aɣen aman, acku llant aṭaṣ n twaculin ur lḥiqent ara iman-nsent. « Aman dagi ɣurneɣ (Ibarbacen) d-agnu amuqran. Uɣalen as t-iniḍ d-uraɣ! Imi, nukni n-uɣal nettnadi ɣef tiqqit n waman ṭul n-useggas. Yagi deg unebdu, anda aman ttexaṣṣan mliḥ. Akka daw n sin wagguren ad d-yaweḍ waggur n Remḍan, aɣubel n waman ad yenerni fell-aneɣ. Ur neẓri ara akka tifrat n tazɣent-agi n waman n tissit ! » i aɣ d-yenna yiwen n Mas, bab twacult i zedɣen deg tama-agi n Iberbacen. Imezdaɣ d tidet, fuden, ulac amek ad d-afen tasarut i wagnu-agi n lixṣaṣ n waman n tissit deg yiqudas. Maca, yella akkeni yiwen usenfar yeɛnan acuddu n tɣiwant n Iberbacen ɣer waman n-ubaraǧ n Tici Ḥaf. Dacu kan, mazal ar ass-a ur iban ara usenfar-agi ma yella ad yeḍru neɣ ala. Imezdaɣ ttraǧun… »Araǧu yuɣal d lbatel… » akken yecna ucennay awaɣzniw Ayt Mengellet. Ma yella akka, Ibarbacen ttraǧun, acku d-araǧu kan isen-id yeqqimen! Deg tallit-agi, mazaliten ttraǧun tuɣalin n waman deg yiqudas n tissit kul 5 n wussan. I waya, mači d lbaṭel tura ?
Syphax Y.