Mm yiγiγden

Partager

Aḥric wis 2

Tudert-is gar-asent tugar tin n yal taklit di tallit talemmast, teεkef seg ufraḍ n leγbaṛ deg udaynin, aḍummu n yiḥuccan, deg axxam d beṛṛa, aseyyeq, anejruḍ n uṣaγurr, asired n iceṭṭiṭen, taruẓi n tregwa di tebḥirin, aḥuccu n uslen d wulmu, terna tettagm-d aman si tala d wahin d tahin…Ayen akk yugaren adrar-agi n leqdic yuran di twenza-s, d ddemmarr n yir lehdurr d uskeεrer-nni sskeεrirent fell-as terbibin n baba-s.Yal mi ara treḍqent wallen-nsent fell-as, γas ma s tuddma, ibibbi d εeggu i d-tekcem s axxam, rennunt-as urfan, surugent kra γef tγerγert am yirden d wayen-nniḍen. Ttgallant deg-s ar tefru iḥuccan fell-asen am wakken yessifiy uγerbal aclim neγ ma tuder-as teḥdert n uγrum deg yimi. Ula d tameddit mi ara tesred, tefser tgeswaḥt yekkren ngum tanekra n wass si rrḍiḥ d nnṭiḥ war asteεfu, ur tt-id-yetṣssaḥ ara, ad tsers iγsan-is deg usu, ala. Teggan γef tγerγert s iri n lkanun, d iγallen-is i d tasumta. Rnant-as llaqubat, sawalent-as Mm yiγiγden imi i tt-tuli tebrek seg wabbu akked wammus n yiγiγden. Yiwen wass, yekker baba-tsent ad yerzu γer walzuz ( agdaz, ssuq ) s uεewdiw, yesteqsa tirbibin-is d acu ssarament ad asent-id-yeglu yis-s. Yiwet tessuter deg-s icettiḍen imaynuten igerrzen, tayeḍ d tiwiztin. Yuγal yenna-as i kemm a Mm yiγiγden, yella kra ad am-d-awiγ ? M-iγiγden: ‘’Teẓriḍ a ba, afurek amezwaru ad ak-id-iqasmen deg ubrid miara d-taliḍ γef teεrurt uεewdiw ma d-tuγaleḍ s axxam, qeṛṛem-iyi-d axeclaw-is, glu-yi-d yis-s ttxil-k’’. Argaz, yuγ-asent awal, yuγ-d icettiḍen imaynut igerrzen d twiztin, yerna yeṭṭf-d s lemεamda abrid n teẓgi s axxam akken ad as-d-qasmen ifurkan. Amezwaru i d-yemmuger, yewwet-it-id s acelqi&epsilon,; yeγḍel-as ula d lemḍella yelsa i uqeṛṛuy-is, igzem-d seg-s axeclaw, yewwi-t-id yid-s. Mi d-yewweḍ s axxam, yal ta yeffka-as ayen tessuter deg-s, ḥala Mm yiγiγden i as-yennan tanemmirt-ik a baba… Tettkemmil

Yerra-tt-id seg talmanit Essaid Ait Maamar

Partager