Tiddukla Tadukli n tnezduɣt tasdawant Aamriw akked tasbeddit Tiregwa n Canada llant-d deffir n tejmilit yuɣalen i Slumane Azem. Di tnezduɣt tasdawant, tella-d temzikkent n tugna d imagraden yuran yeɣmisen akked wid uran inelmaden. Isyin iḍefer-d usarag n uneɣmas Mas Abdenour Abdesslam. Deg-s, yessefhem-d tuget n tezlatin-is, i yerra deg wadeg asertan-ametti deg yella yettidir umedyaz. Aṭas n yinelmaden d tnelmadin i d-yusan ad smeḥsen i Mas Abdenour Abdesslam, u ad t-seqsin deg uskasi id iḍefren, ladɣa ɣef umdiq n lɣerba akked umennuɣ ɣef timagit deg tmedyazt n Sliman Azem. Di tmeddit, tella-d yiwet n tmeɣra id yebdan s terbaɛt Ṭawes Amruc id yewwin kra n tezlatin n Dda Sliman : “Tamurt-iw atin aɛzizen», “atin iǧǧiɣ melba lebɣ”i akked “Ay Afrux Iferiles”. Isyin ikcem-d Lurkistr n tarbaat uẓawan Tilania s ddaw n tnemhalt umaystru Athmane Belaid. Icennayen : Yacine ZOUAOUI , Abd El Kader BOUHI d Ferhat HAMDI, kecmen-d yiwen s deffir wayeḍ i waken ad cnun tizlatin n Sliman Azem. Deg taggara Tadukli tefka aselkin usnummer i yal yiwen/t i yettsekan deg tejmilt-a. Yenna Mas Mir Okba, s yisem-is d amaray amatu n Tidukla, u d amdebber n taɣwalt d isalen deg-s: “Nekk d Amaziɣ, ger wid/tid id yeslalen Tiddukla Tadukli. Win yicban ḥemleɣ mačči d kra Dda Sliman. Asmi i aɣ-d-nced Tasbeddit Tiregwa ilmend uheggi n tejmilt-a, ur xemmeɣ ara ula d dqiqa. S tumert tamuqqrant Iinqubel tikti-a. Ur ntettu ara belli Dda Sliman, d argaz ur nelli ara am wiyaḍ; d ccix, d amedyaz, d argaz ixedmen aṭas ilmend usnerni n yidles-nneɣ. Ihi tiririt n tejmilt unazur-a, d amahil amecṭuḥ i nezmer ad tnexxdem. D tadfi (plaisir) muqqren i d-nexdem tajmilt-a akked tesbeddit Tiregwa, i aɣ-d-yefkan afus n lmaɛna, am imagraden d tugniwin urǧin nezra ɣef Dda Sliman.” Mas Mir Okba, yerna deg wawal-is: “Neɛreḍ ad d-nesmekti i tsuta tamaynut n inelmaden, d anwa-t Dda Sliman, u ad id-nesufeɣ seg tatut. Amahil-a nneɣ d awezzlan sdat n wayen akk id nelmed sɣur Dda Sliman ama seg temɛinin-is wala seg isefra-is.”
Deg taggara n tejmilt, aselway n Tidukla Abarbour Yacine, ifureṣ tagnit n tejmilt-a i waken ad isɛeddi izen i yinelmaden n tesdawit n Bgayet ilmend n ultay (adhésion) ɣer Tidukla, i yettwasnen s tmeɣnest akked imahilen i tetteg i yidles d tazuri d imetti.
Racid At Ali Uqasi,