Deg temzizelt n usesmel n trebbaε n umezgun n lwilaya n Bgayet i texdem tenmehla n yilmeẓyen d waddal (DJS) deg waggur n meγres iεeddan, tufrar-d terbaεt »Aweγlis » deg umḍiq amezwaru s tceqquft umi tsemma « Lwexda iṣaren ». Tarbaεt-a ideg tuget n yiεeggalen-is d inelmaden ama d wid n tesnawit d uγerbaz alemmas neγ d wid yeqqaṛen di tesdawit, tqeddec deg uxxam n yilmeẓyen n tγiwant n Chemini, am akken daγen i d-tturaren ticeqqufin-nsen yal tikkelt mi ara d-ttwaεeṛḍen ladγa sγur tiddukliwin tidelsanin n lwilaya n Bgayet. Tarbaεt-a n umezgun, tlul-d deg useggas n 2006, sin n yiseggasen mbeεd talalit-is (2008) tufrar-d d tamezwarut deg yiwet n temzizelt i d-yellan, deg Ssuq Letnin; terna daγen tewwi-d araz amezwaru deg temzizelt-nniḍen i d-yellan deg Uqbu deg useggas n 2009. Am wakken daγen i d-tufrar ger tiyaḍ ilmend n yiḍrisen n tceqqufin akked d usufeγ-nsent deg tfaska taγelnawt n umezgun asdawan i d-yeḍṛan di Jijel deg useggas n 2011. Aya akk γas lixṣas n ttawilat i tettmagar terbaεt-a, imi iεeggalen-is qeddcen s tzemmar-nsen mebla ma ufan lemεawna γer yimḍebbṛen ladγa wid n uḥric n yidles, d ayen i aγ-d-yenna mass Messaili Mohand Sadek netta d amyaru n yiḍrisen n tceqqufin, yetturar daγen γef usayen(scène) : » Nekni nxeddem s ttawilat-nne&gamma,; γas imḍebbṛen ur aγ-εawnen ara, acu kan mazal-aγ nesεa ifadden akken ad naẓ ugar γer zdat ».
Akken ad nesmekti, tarbaεt-a txeddem amezgun ama i yimeẓyanen ama i yimeqṛanen, γef waya ggten yisental iγef d-ttawin yiεeggalen-is ama d timetti, tasertit, leγerba d wayen akk iceγben imdanen n tallit ideg nella. Assirem n yiεeggalen n terbaεt n umezgun « Aweγlis », bγan ad ufraren γef uswir n tmurt d umaḍal am akken i aγ-d-yenna mass M. M. Sadek » Ar zdat nettmenni ad ldint fell-aγ tewwura akken ad nttekki di tfaskiwin n umezgun tiγelnawin ayγer ala tigreγlanin! ».
Mokrane Chikhi