Di lawan anda imezdaɣ n Tubiret zzin tiṭ ɣer uḥric n usegmi d yisenfaren iwulmen di temnaḍt-nsen, talafsa, i nwan akken yettuneqḍaɛ lḥes-is tuɣal-d s wudem yesserhaben.
Tamenzut, d iǧadermiyen n tɣiwant n Leɛǧiba i yersen d lɣerḍ i yimesḥaf mi akken ndin yiwet n lbumba ɣef yiri n ubrid deg umkan iwumi qqaren Tizi Muḥac. Di tuɣalin-nsen seg taddart n Semmac, iɣallen-a n laman selken seg yiwet n txazabit tameqrant, imi teṭṭerḍeq lbumba uqbel ad awḍen s amkan. Ɣas akken tḥuza yiwet n tkerrust, maca ulac acu yeḍran d wid yellan deg-s : baba-s d mmi-s. Ur ḥbisen ara da yicenga n tegduda, meɛna d iɣallen n laman yettɛassan di Tewrirt ɣef talast gar Tubiret d Bordj Bou Arréridj, iwumi ndin tlata n lminat. Ula dagi ur d-telli kra n txessart di lerwaḥ. Di ddurt yezrin, d tamdint n Tubiret i yeddren di tugdi n rrebrab, imi lewhi n uzgen n yiḍ, yiwet n tkerrust n yimessulta iɣef yemmer ubruri n rsas. Lawan-nni, mazal imdanen di berra, s twaculin-nsen, fɣen-d iwakken ad merḥen imi izad uzɣal deg yixxamen. Fursen tagnit yirebraben iwakken ad nɣen kra seg yiɣallen n laman i yettɛassan ɣef yimdanen di lawan-nni. Yiwen n umessaltu i iruḥen d asfel, meɛna ahetwir yekkren yeɣleb ayen i d-yeḍran.
Deg yimalas-a daɣ, d iǧadermiyen n tɣiwant n Ccerfa iwumi tekka txazabit di Ḥnif, deg ubrid wis 5. Ula da, ur d-telli kra n txessart ara yeglun s terwiḥin.
Ma di tama n Ḥizer, iɣallen n laman ssawḍen ad rren talast i setta n yirebraben yettheggin ad mlilen d yimeddukkal-nsen deg udrar. Wigi, ha-ten gar yifassen n yiɣallen n laman. ,Iwulem ad d-nini dakken taswiɛt ideg tettidir temnaḍt-a mačči d tin yessefraḥen, imi tuɣalin-a n yiɛdawen n tudert di lawan n uzɣal d tin ara d-isersen tugdi d rrehba. Rnu, yezmer lḥal d aheggi i waggur n remḍan anda i wulfen xeddmen lexsarat timeqranin. D ayen ara yeǧǧen ass-a imdanen ad ḥadren ɣef yiman-nsen, imi yeqqar yinzi : win i as-yennan yexla lexla, d netta i yexlan.
S. M