Qqaṛṛen zzman, tazmert n twacult tettuγal γer wacḥal n yirgazen tesεa, acku argaz d netta i ittqabalen aεdaw n beṛṛa, yerna d argaz i isεan tazmert n yifadden tetteḥwiğ txeddimt n tmurt am tkerza d tmegra atg…
Di lecγwal imxalafen, γef wayagi mi ara ilal uqcic siγritent tilawin, zellun akraren, ma illa d taqcict mi ara tlal berrun i wallen am wakken s usḥissef, dγa ad as-inin i temnifrit awi-d kan i mi teselkeḍ am wakken d awezγi id-iḍran, akka i d lεadda tettwaḥettem-d si yal tama.
Yiwet n tikkelt, yiwen n urgaz isεa ala tullas, iṛγa ad isεu mmi-s xarṣum a d-igwri yisem-is, mi terfed tmeṭṭut-is s tadist inna-yas:-A tameṭṭut ḥṣu tikkelt-agi ma d tallest id-tesεiḍ a tt-nγeγ wa ad gluγ s uqaṛṛu-m neγ muqel anida ara tegreḍ lεemeṛ-im.
Tameṭṭut ur d-tenni awal, tefhem d acu id-iwwi lḥal maca mačči d lγerḍ-is, tettru tsusem, mi d-iwweḍ wass ideg ara terbu, argaz iruḥ γer lexla am win yugaden, iqqim seddaw n tzemmurt iqqaṛ-as:-A Ṛebbi ttxil-k kullec fell-ak ishel.
Ideεεu armi t-iḥwes yiḍes, di lemnam n Ṛebbi (targit) iwala irna γur-suqcic ifreḥ isečč akk taddart, iṛebba aqcic-nni armi meqqer yuγal-as d waγzen ayen akk ikseb izenz-it igla ula s uxxam n jeddi-s, ad iṭṭef si lḥebk as-yini ad id-muddeḍ aya d waya neγ ad gluγ s leεmeṛ-ik, yuγal yuki-d si tnafa, ifhem targit-nni d acu-tt iruḥ-d d tazzela γer uxxam, isawel-d:-A tameṭṭut d acu id-tesεiḍ?
Tameṭṭut s imeṭṭawen d lxuf:-D taqcict.
Argaz iγli γef tgecrar iqqar-as:-A k-ḥemdeγ a k-cekreγ d kečč i iẓran d acu ideg illa leṣlaḥ.
Yeḥya Yanes.