Aseggas-a, asmekti n timunent n Lezayer yella-d deg waṭas n temnaḍin n tmurt n leqbayel. Amulli n tikelt-a yemgarad γef wiyaḍ imi yewweḍ uzgen n lqern seg wasmi i teffeγ Fransa si Lezzayer. Ayeggi i umulli-a, yella-d acḥal-a. Aṭas n leqdic i d-tessewjed lwilaya n Tizi Wezzu i lmend n waya, ladγa, deg wayen yeεnan isenfaren. Akka,dγa, i d-yella uftaḥ, sγur uneγlaf n daxel, n Sinima ‘’Mondial’’ di temdin n Tizi Wezzu, axxam n yidles n Yiεezzugen, abrid di Tedmayt. Ma d isenfaren ara yebdun sya d afella iwumi yessers aẓru amezwaru, yella : lebni n 5000 n tnezduγin di Wad Fali, 1000-nniḍen di Tamda, axxam n tenmehla n yidles n Tizi Wezzu.
Ula d lwali n Tizi Wezzu yessmekta-d amulli n timunent n Lezzayer s yiwet n temlilit anda i d-yenced kra yellan d imḍebber di Lwilaya n Tizi Wezza, ama d wid n dduwla neγ d wid n yikabaren. Akka, dγa, ameslay i d-yenna sdat yinebgawen-is, yebda-it-id s…teqbaylit. Aṭas i iwuhmen mi walan Lwali yeqqar-d s teqbaylit di tewriqt, axaṭer ẓran-t mačči d aqbayli, yerna melmi kan i d-yewweḍ γer Tizi. Ha-tt-n ihi teqbaylit d tunṣibt i wid yebγan ad ddun deg ubrid-a ma d taqbaylit, dγa, i ttnadin…
Di Tala Khellil
Am leεwayed-is, taddart n Tala Khellil i d-yezgan di tama n At Dwala thegga-d ahil s wazal-is i umulli n timunent n Lezzayer. Leqdic i d-swejden tikelt-a yebḍa γef 3 yiḥricen : deg uḥric n waddal, llant-d temliliyin n ddabex uḍar, timsizwert n tazla… ; deg yidles, yella-d umezgun, timsikent, ccna n lgerra… ; am wakken i d-yella uftaḥ n yiwen usebdad. Di taggara n leqdic, yella-d yimekli i wid akk iḥeḍren i usmekti. Ayen yessefraḥen di leqdic-a, εlaḥsab n Remḍan, dakken d ilmeẓẓyen i d-yekkren rran tajmilt i yimjuhad. Aṭas i d-yusan ama si lγerba neγ s temnaḍin n tmurt n Lezayer.
Di Tala Athmane
Tiddukla n yimawlan n yinelmaden n uγebaz amenzu ‘’Atmaten MOULA’’ n taddart n Tala Σetman, tesmaekta-d amulli n timunent n Lezzayer s tejmilt i terra i 21 yimeγras n taddart-a. D agnit anda, di&gamma,; i tefka arrazen i wid i d-yufraren deg yikayaḍen n 5°,; BEM d BAC. Am wakken i rran tajmilt, iεeggalen n tiddukla-a, i yiselmaden iεeddan syin akked d kra n yinelmaden ifazen deg umecwar n leqraya i d-yefγen ass-a d imejjayen neγ d iselmaden…Am wakken i d-necden akk iminigiyen i d-yerzan γer tmurt deg yimuras-a i wakken ad asen-rren tajmilt.
S lferḥ d ameqqran i mmsefraqen wid i d-yerzan γer temlilit u cekkren aṭas imḍebbren n tiddukla γef leqdic-nsen. Ssaramen ad ddun u ad ḍulen deg ubdrid-a i d-wwin.
Hocine.M