Tagrawla tatiknulujit d tumant i ihegglen amaḍal irkelli. Akken kan tebda tasut tis 20, asnerni n wallalen n teywalt akked usikel rran amaḍal amzun d taddart. Гas akken wwin-d aṭas n wayen yelhan i tudert n umdan deg wayen yerzan isallen, tamussni, idles. Wwin-d daɣen aṭas n yiɣilifen mugadit nezzeh ɣef umdan akked umaḍal. Ad ten-d-naf ṭṭfen adeg n tewsatin n tsekla am tmacahaut, amedya, At zik ttɣamayen sdat n lkanun, ḥekkun-d timucuha. Ma d tura ur d-nettaf lkanun, ur d-nḥekku timucuha. Zik i wakken ad ssedhun lwacul ḥekkun-asen-d timucuha neɣ timɛayin, ma deg tallit-a tamirant ad asen-xeddmen ttiliẓri neɣ d ayen-nniḍen i yeqqnen ɣer wallalen n teywalt. Ad naf tasertit tetturar s wallalen n teywalt akken yetteffeɣ fell-as, amedya amezwaru ara d-nebder, d tanekra n Leqbayel deg useggas n 2001. Neẓra akk acimi i d-kkren maca isallen nnan-d dakken Leqbayel bɣan ad bḍun tamurt. Amedya wis sin, d tazɣent i tɛedda ɣef tmurt ussan-a, iberdan bellɛen, lgaz ulac, učči ixuss. Ma d isallen nnan-d belli igen yeldi iberdan, yessaweḍ učči ɣer tudrin yenṭerren, nnan-d daɣen NAFTAL terna deg watug n ufares n lgaz. Ma yella deg tidet, igen ur yeffiɣ, ur yexdim kra, d medden kan mɛawanen deg way gar-asen. Ihi, medden ixeddem yettazzal yettneɛtab, adabu yettawi cciɛa s ubrid n yisallen. Dɣa uqbel n ufrari n wallalen n teywalt, medden llan ḥessben adlis d amdakel ur nesɛi iles, ma d tura yuder wazal-is imi smenyifen fell-as rradyu, tiliẓri, l’ internet. Taneggarut-a tessader deg uswir n tɣuri acku, amedya, inelmaden n tallit-a ma sɛan aneskin ttruḥun ɣer ɣur-s ttekksen ayen tteḥwaǧen, ttakken-t-id i uselmad-nsen i wakken ad t-yeskazal war ma ɣɣren-t. S wakka aswir-nsen n tɣuri yettader cwiṭ cwiṭ. Ma yella inelmaden n tallit n uqbel l’ internet llan xeddmen ineskinen-nsen d yinadiyen-nsen s usemres n yidlisen. S wakka aswir-nsen n tɣuri dima yettnernay. Ihi, nella neɣɣar aṭas i waken ad naru cwiṭ ma d tura aql-aɣ nettaru aṭas war ma neɣɣar kra ( tumant n copier/ coller). Tin ɣur-s, assaɣ yellan gar yiɛeggalen n twacult yeqqel d afessas acku ulac tagnit ara ten-yessemlilen imi yal yiwen ixeddem ayen i s-iɛejben, yiwen yettferriǧ ttiliẓri, wayeḍ yettḥessis i umaṭaf. Anect-a i yeǧǧan kra seg-sen ad iruḥ d asfel acku ulac taywalt gar-s d yimawlan-is, ulac i wanwa ad d-yeḥku ayen i t-iqerḥen neɣ ayen i yessaram. Гef wanect-a ad t-naf iḥḥekku-d uguren-is d yiḥulfan-is i yimdukal-is. S wakka ad yernu ad yejbed iman-is ɣef uxxam acku yufa ameẓẓuɣ i s-d-yettḥessisen d yiles i t-yettwellihen. Aya akk d agemmuḍ n tibawt n tegnit n tmeslayt d uqesser deg uxxam. Tibawt n tegnit-a n tmeslayt d uqesser deg uxxam ɣur-s aɣilif-nniḍen ɣef yidles d tutlayt imi ilemẓiyen lemmden idelsan iberraniyen ɣef leḥsab n yidles-nsen anasli, ggaren-d awalen ijenṭaḍen deg tmeslayt-nsen. Ihi, idles d tutlayt n wass-a ttuḥazen nezzeh imi idelsan d tutlayin iɣemmaren yezmer ad sbelɛen idelsan d tutlayin yettuɣemren. S wakka agdud yettuneɣmer yettaf-d iman-is war idles. Ma d arwaḥ n tneggarut-a d lexsara tameqqrant i ugdud acku « Agdud mebla idles am umdan mebla iles ». Deg taggara ad d-nini ilaq ad nessenqes asemres n wallalen n teywalt deg tmetti neɣ xersum ad nissin amek ad ten-nessemres acku neẓra kra n yiɣilifen i d-wwin i tmetti.
Brahim Djaber (Kadiria, Tubiret)
Majistir n tmaziɣt di tesdawit n Bgayet