Zemmen rebɛin n wussan, am wakken i yella deg unsay, ɣef Lmulud. D ilemẓi, akken kan yebda yeǧǧuǧǧug, tecleqf-it lmut. Ur yelli d win i inudan ɣef twaɣit-a, neɣ ahat tuɣ-it di tmeqyas n udrar yettgani imesḥaf. D anelmad di tesdawit n Tlemcen, yettheggi ad yili seg wid ifazen di leqraya, ad d-yeffeɣ s tmusni ara s-inejren iberdan ɣer tafat. Maca, akken i tettezzi tegnawt di ccetwa neɣ lqaɛa ɣef yiṭij i tettezzi ɣef yimdanen. D lawan n yimensi, Lmulud d yimeddukkal-is, am wakken i mwalafen, ruḥen ad ččen talqimt, tinna akken yeglan s terwiḥin-nsen. Aniwa ara sen-yinin dakken talafsa tettraju deg-sen, iwakken aqadus-nni n lgaz ad yeṭṭerḍaq di lwan-nni mačči uqbel neɣ mbeɛd. Am wakken d lweɛd i yella gar-asen ! din kecmen, din tendeh twaɣit ! yurag-d fell-asen sqef amzun d asyax !
Inelmaden-a yewwḍen leɛfu n Rebbi, ula d imeddukkal-nsen iselken, d wid i d-yufraren deg ukayaḍ n Bac s tezmilin igerzen, yeɛni mačči akk wid irebḥen zemren ad kecmen tasdawit-a. Unagen almi d Tlemcen iwakken ad ilin seg wid ifazen di tmusni, ad d-awin igerdasen ɛlayen.
Ass-a, imi yura di twenza n wid i ten-id-irebban, ala lweqt i d ddwa n lemḥan. Tawacult n Lmulud, xas akken d tin yeqnen asirem-is ɣer rrbeḥ n mmi-tsen ara ten-id-yessufɣen di ddiq, ur tettili seg wid neɣ tid ara yebrun i usirem. Yak yenna ccix Muḥend deg wawal-is :
Ifer n yibawen yegman d asawen, xellun-tt ɛecra Yeḥya-tt-id yiwen.
Di tegnit yecban ta, ala talwit ara nessirem i Lmulud d yimeddukkal-is tḥuza twaɣit.
S. M