Taɣiwant n Aḥnif i d-yezgan deg usammar n Tubiret ; deg wussan 4 ,5 yulyu ilmend n usmekti n umulli wis 50 n timunent n Lezzayer , di tzeqqa n Uɣerbaz Alemmas Hocine Messaoud, yella-d yiwen n leqdic s wazal-is i yemmugen s ufus n yimḍebbren n tɣiwant. Tameɣra-ya ttwaɛerḍen-d ɣur-s ugar n 300 n yimdanen gar-asen lmuǧahidin ,arrac i d-yewwin BAC d BEM akk d yimḍebbren n tɣiwanin-nniḍen i as-id-yezzin i tin n Aḥnif. Ma yella d ahil i d-xedmen yekka sin n wussan ; deg wass amenzu yella-d yiwen n usarag ɣef wayen texdem Fransa di Lezzayer, xedmen daɣen yilemẓyen n tmennaḍt-a yiwet n tceqquft n umezgun ɣef yimjuhad d yimeɣrasen , rnu ɣer waya ttunefken warazen i wid akk i d-yewwin l’BAC akk d wid i d-yewwin l’BEM. Seg tlata n tmeddit d tasawent, tella-d yiwet n tmeɣra tameqqrant yecna-d deg-s Farid Ferragui akk d kra n yicennayen ilmezyen n temnaḍt-a .Ass wis sin, imḍebbren d yimeɛraḍen ẓuren-d iẓekwan n yimeɣrasen i d-yezgan di Tiqesrayin d Ighzer Oumeziab, ɣran fella-asen lfatiḥa rnan sersen-asen ijeǧigen, rnu amuddu n warazen i yemjuhad, tilawin n yimeɣrasen d twacult n ucennay d umjahed lmerḥum Salah Sadaoui.
I usmekti, acennay-a i win i wumi rran tajmilt ,ilul deg useggas 1936 di taddart tiqesrayin di tɣiwant n Aḥnif ,yekker-d d afellaḥ ur yeɣri ara ,yunag ɣer Fransa mi yesɛa 20 n yiseggasen di leɛmer-is .Yekcem ɣer lǧihad (FLN) deg useggas n 1956 , yemmut ass 09 magu 2007 di Fransa yenṭel di lezzayer tamaneɣt.
Rabia Soraya