Ass n lexmis yezrin yeḍra-d yiwet n txessart deg ubrid aɣelnaw wis 5 deg umkan iwumi qqaren Isula tegla-d s lmut n yiwet n temɣart yesɛan azal n 63 n yiseggasen d sin n yimejraḥ.
tawaɣit-a teḍra-d mi akken yiwet n tkerrust Toyota teɛreḍ ad teǧǧ abrid i yiwen n ufurgu i d-yusan di tama-s s lemɣawla. leɣseb di tikli ur yefki ara tagnit i yinehharen iwakken ad melken iman-nsen d tkerrusin-nsen, dɣa msemlalen udem ɣer wudem.
Ɣef leḥsab n yisallen i aɣ-d-yewḍen, tamɣart yellan di tkerrust tamenzut tessufeɣ tarwiḥt deg ubrid mi akken i tt-wwin ɣer sbiṭer. Ma d yiwet n teqcict tameẓyant mazal-itt ar ass-a di sbiṭer n Tubiret imi terrez deg ufus. Anehhar ssawḍen-t ɣer sbiṭer n Tizi Wezzu deg yiwet n liḥala ur nelhi ara.
Win i d-yusan srid ɣer tkerrust-a yeslek imi kra kan n lǧerḥ xfifen i yesɛa.
S. M