Taggara n yimalas yezrin tenhez temdint n Tubiret i tikkelt-nniḍen mi d-yeɣli yiwen n uhebhab ɣef yiwen n uxxam tama n Ecotec, yiwen n uzniq iɛemren s waṭas n yimezdaɣ.
Tiyita-a tella-d lewhi n uzgen n yiḍ, yerra-d lewhi n tnawalt n yiwen n uxxam yellan deg uswir wis xemsa. Ɣef leḥsab n yisallen i aɣ-d-yewḍen, irebraben ixedmen taxazabit-a qesden-d yiwet n terbaɛt n yiǧadarmiyen yellan tama n lbaṭima yettwaḥuzan. Tiyita-a ur teskir ara lemḍerra di terwiḥin, maca tugdi tekka-d nnig n lexsara i d-yellan imi mačči drus n yimdanen i teṭṭef lfeqɛa almi i ten-ssawḍen ɣer sbiṭer Mohamed Boudiaf n temdint-a.
Din din, texla temdint, s kra n twaculin yellan di berra nnejmaɛent ɣer yixxamen, imi liḥala mačči d tin yessefraḥen.
iwulem ad d-nesmekti dakken mačči d tikkelt tamenzut i d-teḍra twaɣit am ta, meɛna drus n wussan aya segmi irebraben smaren abruri n terṣaṣin ɣef yiwet n tkerrust i yimeṣṣulta yellan ddawaren deg yiḍ ttɛassan ɣef yimdanen yellan lawan-nni di berra akked twaculin-nsen.
Am wakken daɣ i d-wḍen kra n yisallen anda mmeẓren yirebraben deg waṭas n tamiwin n twilayt n Tubiret. D ayen i d-yerran tugdi d uɣilif gar yimdanen ladɣa mi akka i d-iteddu waggur n Remḍan ideg wulfen yiɛdawen-a n tudert aqmaḍ n terwiḥin. Rnu ɣer waya azɣal i d-yersen deg wussan-a i yettaǧǧan imdanen ttefɣen ad merḥen ula deg yiḍ ḥaren deg yiman-nsen amek ara qablen taswiɛt yecban t, ma ad rẓen ẓẓerb n tugdi neɣ ad qqimen deg yixxamen-nsen.
Si tama-nsen, iɣallen n laman yesweɛen anadi-nsen ɣef yirebraben ssawḍen ad ṭṭfen di tama n Haizer 06 n yimdanen daxel n yiwen n ufurgu ttheggin ad alin ɣer udrar iwakken ad mlilen d yimeddukkal-nsen dinna. d yiwet n tcerket s wazal-is i yerran talast i lhem i d-ssewjaden yimdanen-a. Akka tura, iɣallen n laman ssejhaden anadi d lɛessa di yal taxlift.
S. M