Taddart n Boussouar d yiwet seg 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef temdint-a azal n 8 km. Taddart-agi mazal ar ass-a n wussan tettidir iseggasen-agi ineggura lexsas d ameqqran, deg yiḥricen d yisenfaren yemgarden n tudert tatrart gar-asen: ttawil n Internet, lgaz n temdint, yir liḥala n yiberdan, asezdeg n tawennaḍt, imḍiqen i yilmeẓyen, d uɣbel n waman tissit… Ssuturen imezdaɣ n taddart-agi n Boussouar deg yimḍebren teεna temsalt, ama d wid n usqamu aɣerfan (APC) n Ait Aissa Mimoun ama d wid n lwilaya n Tizi Uzzu, i wakken ad d-rren lwelha-nsen ɣer taddart-agi yenḥafen aṭas si yal tama. Menbeεd mi ttidiren akka tura deg tegnatin qessihen. Ma d iɣeblan i d-ttmagaren yal ass, ad naf deg tazwara aɣbel n waman n tissit, imi ufan-d iman-nsen ttnadin ɣef tiqit n waman anida ara tt-id-awin. Acku ttɣaman laqdɣa deg unebdu azal n 5 ar 7 n wussan i wakken ad d-uɣalen waman yiwen ubrid. Cetkayen daɣen, ɣef uεeṭṭel n uṣiweḍ n lgaz n temdint s ixxamen-nsen; imi ṛwan lḥif ladɣa deg tesmhuyt n tegrest, neɣ deg ussan n ccetwa, imi acḥal n tikkal i leḥḥun d likumiṭer i wakken ad awin taqqerԑat n lgaz, uɣur ara sewwen neɣ uɣur ara seḥmun. D ayen i ten-yeğğan ad d-gren tiɣri yerna ad ssuturen deg wid teԑna temsalt gar-asen: imeḍberen n tɣiwant Ait Aissa Mimoun, d Tanmehla n Imuhal Izuyaz, i wakken ad yefru wugura-a deg wussan i d-iteddun. Aɣbel wis ukuẓ d win n yiberdan; imi aṭas n yiberdan yellan deg taddart-agi, ha-ten-an deg yir liḥala, yecban abrid ameqqran yeqqnen gar-as d Igunane Ameur rnu ɣer-s abrid yell n daxel n taddart. Aḥric n tedwest d ṣṣeḥa (la santé) d win yenxesen ugar n yiḥricen niḍen, imi ur sεin ara axxam n tujjya ara yesneqqsen taεekkumt ɣef yimezdaɣ-is. Ma yuḍen yiwen ilaq ad yerzu ɣer uxxam n tujjya n Akaoudj neɣ win n Tala Illilane. Mebla ma nettu ugur n Internet, i mazal ur yefri ara. Ma yebɣa yiwen ad yazen neɣ ad d-yawi kra seg Internet, ilaq fell-as ad yerzu arma d temdint n Tizi Uzzu. Ayagi yebɣa ad d-yini d akken ilaq ad ilḥu 10 km, neɣ yezmer lḥal ad isruḥ yiwen wass, ɣef liğal n ssaεa. Maca lukan i d-tewwiḍ s ixxamen tili mačči akka. D annect-agi akk n yiɣeblan iyerran tudert n twaculin n taddart n Boussouar ttidirent deg lḥif d lmeḥna, ɣef waya ssuturent deg yimḍebren ad d-lhin deg wuguren iceɣben allaɣ-nsen, u ad d-afen tifrat i yiɣeblan s tazzla.
Adaoun Abdel Ghani