Aṭas i tekkes tallit tamaynut i d-yewwḍen d tannumiyin d leɛwayed i tuɣ ugtent deg tudrin n tmurt n Yizwawen. Ahat Azwaw ur yufi abrid iwulmen akken ad iqabel zzman atrar war ma yebra i uqbur. Imi deg uqbur i nuḥen yakk wansayen d tannumiyin-is n tudert. D ameslay ɣef lmaɛesrat, imzilen, ixxamen n uqermud, d wayendin n tɣawsiwin-nniḍen i iḍebɛen ɣef tudert n zik n Uzwaw, ass-a ḍḥant-d uqant, ttfakkant s tazzla. I lmend dɣa n tsemhuyt-a n tleqqaḍt d ubray n uzemmur, aṭas i ssarmen lemmer zemren ad d-ɛeddin seg yakk tarrayin n zik send ad d-yuɣal uzemmur-nsen d zzit. Γur kra, d taluft n usmekti n wansayen d tɣara n tudert n yimezwura, amzun d acedhi-nni i ineṭḍen i wallaɣ. Γur wiyaḍ, icudd lebɣi-nsen ɣer tezmert d tɣellist-nsen. Ttwalin timacinin timaynutin n wuzzal, ansi I d-tettɛedday zzit, ur asen-ḍemnent tazmert n tfekka akken ilaq. Ladɣa imi llant kra n lmaɛesrat tatrarin, yeqdim wuzzal-nsent armi qrib ttseddident. « Ur ẓriɣ acimi ur i yi-ččurent ara tiṭ lmaɛesrat-a timaynutin i d-yennulfan. Yal lawan n ubray n uzemmur, ad ttnadiɣ s usirem ɣef walbaɛḍ n lmaɛesrat tiqburin i yi-iqerben, maca ur ttafeɣ tin yeṭṭfen ». D tanaga n yiwen n umezdaɣ seg Ayt Smaɛel. Segmi i d-wwḍent lmaɛesrat tatrarin, aṭas i yeǧǧan lmaɛesrat-nsen timzikin ulamma llan xeddmen yis-sent akked kra n lɣaci. Walan am wakken yeɣleb-iten zzman, ur mazal ara zemren ad d-gren aɣrum s lmaɛesrat i asen-d-ǧǧan lejdud, bran i ṭṭbel deg waman. Wa yuɣ-d timacinin tatrarin, wayeḍ ibeddel tawuri akk.
M.K.