I lmend n umulli wis 50 segmi yebda ccna, Lounis Ait Menguellet yella-d d inebgi n Tubiret ass n lğemɛa yezrin deg uxxam n yidles Ali Zamoum.
Am wakken i yetturaju, tazeqqa n uxxam-a ur tessaweḍ ara ad tawi imdanen akk i d-yusan iwakken ad walin amedyaz-nsen. γef lehsab n wayen i nwala, ayen i yeqqimen deg berra yugar ayen i ikecmen, imi azal n 1200 n yimdanen kan iwumi i d-isah umkan. Uqbel akka ad d-yali, d lwali n Tubiret Mass Mouloud CHERIFI, i d-ilehqen d amezwaru anda i d-ddan yid-s watas n yimdebbren n twilayt. Ur iɛettel ara Lounis iwakken ad d-yejbu ula d netta anda i t-mmugren yimezdaγ n Tubiret s ufus d teγratin. Am wakken i yesfulef wigad-is, yebda s kra n tezlatin yeccuren d anamek, tid yecban « d aya i nesɛa d ayla-nneγ sani i tebγan ad nruh » neγ ahat d aγrib ur zeggreγ lebḥur. Meɛna s ya γer da, ad yezzi agambar-is γer tid yessuzunen ulawen, tizlatin i s-yebda amecwar-is. Sliγ i utaksi, Djamila, telteyyam di leɛmer-iw, ğğant ahat tuget n yimnezhen deg lebhat, imi d wid i d-yeddren yes-sent. Lounis, ur yezmir ad iqabel wigad-is mebla ma yuzen-asen-d kra terzeft lqayen, mi akken i d-yewwi tizlit-nni γef tmettut, dγa ifures tagnit mi akken taqaɛet imerra tettuγu : « Imaziγen, Imaziγen » iwakken ad d-yini : « Timaziγin, timaziγin » iwakken daγ ad yawed γer tinna akken iγef yuzzel atas wawal, « a lmusiw ». Ait Menguellet, yerra seg tama-s tajmilt tameqqrant i wid id-yellan deffir n uheggi n tmeγra-agi anda i d-yenna : « Ad rreγ tajmilt i unemhal n yidles n Tubiret, mebla ma ttuγ tanemhalt n uxxam Ali Zamoum, Massa Saliha CHERBI i n-yusan γur-i γer Tizi Wezzu iwakken ad iyi-d-tenced γer da γer Tubiret. » Dγa ikemmel deg wawal-is srid i lwali, mi as-yenna : « ferheγ atas imi d-ufiγ yiwen n yimdebber d ilemzi ! ». γer taggara n tmeγra yeddan almi yebda wass, Mouloud CHERIFI d uselway aγerfan n twilayt selsen abernus i Lounis iwakken ad as-rren tajmilt imi i d-yerra i tiγri n tmehla n yidles ladγa deg lawan-a n waggur n Remdan.
M. Smail