Tamnaḍt n Wizgan d tin yeddren ussan iweεṛen aṭas deg tallit-agi n nebdu ladɣa deg waggur-agi n remḍan ideg nella, sebba n tmes i yebdan tecεel deg yal amḍiq u mazal tettenfufud ar ass-a. Ayen yeǧǧan tiṣeddarin n lḥamu ulin-t s waṭas. Ddeqs n tẓegwa i yerγan, yečča-tent ujajiḥ n tmes, d ihigtaren n tzemrin i inegren, d ayen ara yeǧǧen zzit, asafar-a i s-ttidirent acḥal n twaculin di tmurt n leqbayel, ad yiɛziz, ad yeɣlay. Qer waya, d tisufa i tedhem tmes, ɣer tama n uxerrub d yisekla nniḍen. Ula d tizizwa ur slikent ara, imi mačči drus n teɣrasin i yerɣan. Ulac tama i tezgel tmes imi seg At-Σica, alamma d At Yeǧǧer, tɛeddid-d ɣef Iγrayen, igersafen d Yiγil n Bukyasa, limer mačči d iɣallen n laman akked yimdanen iɛerḍiyen, ula d ixxamen ad rɣen !
Si tama-nniḍen, deg tɣiwant n Yilula Umalu, azal n 20 n yihigṭaren i tečča tmes gar yisekla i d-yettakken igumma d wid-nniḍen. Lixsas n ttawilat iwulmen yeǧǧa iɣallen n usellek ur zmiren ara ad tt-ssexsin imi ulac iberdan i seg ara ɛeddin.
Islam Bessaci