Tasekla n teqbaylit simmal tettnerni s lmendad n yimyura( yettarun s teqbaylit) iqedcen xas akken yeṭṭuqet lexṣas am tesɣunin yeɛnan tasekla, neɣ nnubat di radyu akked tilibzyu neɣ iɣmisen i d- yedhan s yidlisen d ucbucaɛ ɣef wannect-a. Wicqa deg wuguren , imi skud lebɣi yella, leqlam iteddu d lexwaṭer ! Deg wakka, yennerna-d ɣer wayen yakk yettwarun s teqbaylit ( seg wassen deg i d- yeffeɣ udlis « askuti » n SAid Saɛdi, « Asfel »n Racid Ɛellic « Iḍ d wass » n Ɛmer Mezdad) d wiyaḍ, yiwen ungal d amaynut sɣur Ḥmed Nekkar s yisem « gar ẓzebra d yifḍisen » i d- yefɣen deg waggur n Yunyu yezrin ɣer tizrigin « tamusni – le savoir ». Ungal-agi yezzi yis-nneɣ ɣer tallit deg tendeh tegrawla mgal amnekcam aṛumi alamma d iseggasen imenza n timunent. Taqṣit tebna ɣef sin n yimeddukkal, Muḥend d Mḥend yeggujlen seg yibabaten-nsen. Ungal isenned ɣef kra n tedyanin tiḥeqqaniyin yellan di tilawt. Di lǧerra n sin n yimeddukkal ( Muhend akked M’ḥend) yules-d umyaru( Ḥmed Nekkar) i wayen ddren yimawlen-nneɣ deg teswiɛt-nni anda tabɣest , nnif, tirrugza d yiseɣ suman tugdi, tixidas, leɣder, tamheqranit, ddel akked lḥif. Si temsalt ɣer tayeḍ yettban amek lemrar yessenzef lferḥ, amek ajenwi n nḥas itteqqed deg waggasen, icelleḥ deg taswin. Wid itekkan juren ɣef imeɣben ur nesɛi lwali. Tikwal diɣ, ad naf dakken leḥnana tettwagem seg tala ɣef ur yebni yiwen, imi d win i niɣil d axṣim (d acengu) ara tt-id- yesmiren. Deg wammud n tedyanin ɣef issuk leqlam umyaru, ad nger tamawt ɣef wakken tamsalt ur telli ara d tin fessusen, ur yebḍi ara udem-is ɣef sin : da d tebrek da temlel. Tirrugza tettlal-d di yal tama, lexdeɛ yettaf iẓuran deg yal tamḍiqt. Ḥmed Nekkar (wagi d ungal- ines wiss sin, amzewaru isemma-as : yugar ucerrig tafawet) yesseqdec taqbaylit lqayen , acu kan yella kra n usḥissef imi tikwal yessuget deg wawalen imaynuten yerran taẓayt i tira.. nettḥulfu mi ara nɣer aḍris d akken ayen yesbab i wawalen-nni tezmer-as teqbaylit timserreḥt. Wicqa, imi wa d ungal nniḍen i d-yernan ɣer watma-s.. amer ula d netta ad d-yeglu s wungalen nniḍen.
Ait Slimane Ḥamid