Ilmend n waggur-a n remḍan, axxam n yidles Ali Zamoum yelli tibbura-s i yinaẓuren. Yebda yakan s Rabah Asma d Brahim Tayeb i yekksen lxiq mačči d kra i yimezdaɣ n Tubiret, maca, deg wahil i d-ihegga ad naf yiwen seg yinaẓuren imeqranen i tettraju Tubiret s ccuq.
Lounis Ait Menguellet, imi d wagi i d-yerzan ɣer Tubiret ass n umenzu di ɣuct yezrin, tazeqqa n uxxam n yidles ur d-tqam ara i wid akk iḥemlen Lounis iwakken ad t-ẓren.
Dɣa akka, awal wakken i yuzzel wawal deg yilsawen uqbel tameɣra, aṭas iwumi texreb nniya mi yuɣalen ɣer yixxamen-nsen ur ẓrin Lounis, imi ur ufin ara imukan iwakken ad kecmen. Aṭas dɣa i d-yeqqaren : « limer dɣa imḍebbren n uḥric-a n yidles bɣan ad fken tagnit i yimdanen ad d-asen ad walin anaẓur i ḥemlen, tili ad heggin ttawil deg unnar n temdint, maca imi deg tzeqqa, aql-aɣ di berra.» Ma d wid yellan daxel, s tidet, yesmekta-as-d unaẓur iseggasen n temẓi s tezlatin-nni tiqdimin. Am wakken daɣ i d-yessuk awal ɣef tid n 80, tid yecban “a mmi” neɣ “ay agu», akked tiyaḍ am “ay aberwaq, lḥal iḍaq”.
ad d-nesmekti daɣ mačči d tikkelt tamenzut i d-yerza Lounis ɣer Tubiret, imi iɛedda s-ya deg useggas n 2010, anda yecna di tzeqqa n Errich. Am wakken daɣ i yecna di Tikjda mi akken tessewjed tmehla n yidles n Tubiret yiwet n tfaska n ccna.
S. M