Larebɛa Nat Yiraten, ansi i as-d- tekkiḍ d asawen ! Akka ay d-qqaren.
Maca, leɛli- ines yefka-d irgazen ɛlayen di tmusni, ɣlayen di cfawat n yal yiwen. Cfawat ɣef wid i aɣ- yeǧǧan, yerna ǧǧan-aɣ-d. Cfawat ɣef at wuzzal d wawal, ɣef at lḥerma d lefhama. Cfawat ad ruḥent akin d iseggasen neɣ d leqrun, Win yecfan yecfa, win yuran yura ma d amezruy akka i yella. Ma nebder-d tidyanin n 1857 d umnekcam afransi ɣer tmurt n leqbayel, ad naf tamnaḍt-agi d tin iqublen aɛdaw, inuḍḥen ɣef wakal-is s nnif d uɣilif.
D tallit dɣa ideg id-iban unazur mechuren Si Mohand Ou Mhand, ameqran di ccuɛara akken i as- yeqqar Slimane Azem. Si tallit- nni, taliḍ-d, aṭas n yirgazen i d-tefka temnaḍt n Larebɛa, ama d irgazen n tusna yecban Boulifa, ama d wid n ṭṭrad am Faḍma n Summer, ama d wid n tsertit am Abane Ramdane, ama di tẓuri am wid yecban, Amar Ouyakub d ccix Nourdine iwumi ara nerr tajmilt ddurt i d-iteddun; d Ccix Mokrane AGAWA id aɣ- d-ijemɛen ass-agi d agraw ; iwakken irgazen am wagi ur ten-yettɣumu ara uɣebbar n tatut, ad d-qqimen di cfawa i lebda.
Mokrane AGAWA d anazur, d acennay, d amedyaz. Isem-is icud ɣer tewsit neɣ ṣṣenf n ddker d tmedyazt n ddin di tmurt n leqbayel. Anwi ur nesli di Rradyu i ṣṣut ḥlawen n Mokrane AGAWA, anwa ur ncarrew mi ara isel i Mokrane AGAWA la yeddekkir di leǧanaza s wawalen n ddin ɣef lanbiya d ṣuḥaba d lawliya ṣṣaliḥin, d wawal n smaḥ d tegmat.
D wagi i d Mokrane AGAWA mucaɛen di leɛrac, i d-necden si yal tamnaḍt iwakken ad asen- yili d leɛnaya, d win yessixfifen taɛkemt di teswiɛt n ccedda.
Mokrane AGAWA ilulen deg useggas n 1926 deg At Atelli, d win zzuznent zzawiyat n tmurt n leqbayel seg wasmi meẓẓi, ladɣa Zzawiya n Sidi Amer Ulḥaǧ di Bouzeggane., Dayen isel u yelmed di zzawiyat id as- ineǧren abrid di temɣer-is deg unnar- agi n ccna d dkker.
Mokrane AGAWA yettwassen di tazwara d acennay ɣer tama n Sadek Abǧawi d Abdelwehhab Abǧawi, lecyax meqqren n lmusiqa tandalusit. Yid-sen i yesnerna tamusni-s d ṣṣut-is deg unnar n ccna. Dɣa din di Radyu n Bgayet i yebda icennu deg yiseggasen n 50. Ger tuɣac-is yettwasnen tella “Larebɛa nat Yiraten a tin iwumi zzin Leṣwar», “Lezzayer a tin ḥubbeɣ», “Lezzayer tebna tmerreḥ»,atg. Tigi d tuɣac i yecna deg yiseggasen n trad n tmurt n Lezzayer.
Di timunent n Lezzayer, mi teḥbes Rradyu n Bgayet, Mokrane AGAWA, iruḥ iḥella-d taxbist-is di tenmehla n l’ONAT. Ur iɛeṭṭel ara, yuɣal ɣer ṛṛadyu maca ur yufi ara iman-is. Dɣa ijbed-d iman-is deg useggas n 1972.
Si tallit- nni Armi d ussan ineggura n tudert-is, imi yessaweḍ di leɛmer-is 83 n yiseggasen, Mokrane AGAWA ulac amkan yeǧǧa, netta d terbaɛt n lexwan idekkaren yid-s, ama d tilawin ama d irgazen. Yessazerg-d azal n ɛecra n tesfifin, maca tajmilt tameqrant ad tuɣal i umaṭṭaf wis sin, imi s kra n win i as- isellen ad yili yesla i ṣṣut ḥlawen, ṣṣut yettciriwen,yettḥazen ulawen n ccix-nneɣ Mokrane Agawa.
Teǧǧiḍ-aɣ, teǧiḍ-aɣ-d awal zeddigen ḥlawen di tutlayt, ɛzizen ẓiden.
S-ɣur Hamid BILEK