D amedyaz u d acennay ameqqran n teqbaylit, Said Abbas ilul ass n umenzu n meγres 1961 di taddart Aqemqum, taγiwant n lesnam lwilaya n Tubiret. Asmi yesεa 6 iseggasen yekcem γer uγerbaz amenzu i taddart-is. Syen yekemmel ulmud-is almi yewweḍ γer tusnawit. Said Abbas ur yesεedi-ara akayad n Lbak, acku yexdem yiwet n tezlit iwmi yeqqar « Σic s wallen », dγa imḍebren meqqren n lawan-nni, fehmen d akken tizlit-agi d tizlit n tsertit, γef waya ḥeggfen-t deg wulmud, syen ẓẓeεent-id deg ulmud aseggas n 1978.
Dγa, Said xerben-as lexyuḍ, sεarqen-as lewhi, ulac win it-ifahmen, ama d imawlan ama d wiyiḍ. Maca yezwer-d laεqel, acku akken qqaren » Nnig laεqel d tufγa n laεqel », yesεa tabγest swayes yemmuger uguren s zdat-s. idegger imman-is yekcem γer wexxam n uselmed n lḥirfat n temdint n Wahran, anda yesεedda yiwen ukayad swayes yekcem γer wulmud n lḥirfa (Technicien en communication) deg seggas n 1980 almi 1981.
Syen tessawel-as-d tmurt, iruḥ γer lεeskkar tagara n useggas n 1981. Yewwi taluft teḥma, acku imiren id-ḍrant tedyanin n 1980, tafsut n yimaziγen. Said Abbas icaḍ, ifud tamaziγt, d aharruq-nni i t-yewwin γer tmedyazt d cna sumata, syen yemmuger-d aṭas n wuguren yuεren s zdat-s di lεeskar, yewweḍ yekcem γer lḥebs di lkazirna n Beccar, yesεedda-d ssin n yiseggasen, dγa dayen it-yeğğan yesεedda-d 4 n yiseggasen n lεeskkar. Akka id tudert n wemdan, yal lmeḥna amek it-ḍeggar, maca akken yenna yenzi « Yal cedda tetbeε-it talwit ». Ihi ula d Said Abbas yeẓmi-d allaγ-is swayes igga issem-is teg tebḥirt n tẓuri, yexdem azal n 600 n yisefra s tutlayt n tmaziγt, rnu γer-s yexdem azal n 5 n tesfifin, ayen yettqaraben 30 n tezlatin, maca urεad ur ten-t-isekles ara tamentilt d lexṣas n tedrimt d wallalen n lxedma. Said Abbas yukka di deqs n tfaskiwin n cna d tmedyazt di temnaḍin yemgaraden n tmurt n Lzzayer, am: Tizi-Wezzu, Wahran, Bumerdes, Msila, Bgayet, El Burj, γardaya, d tiyaḍ . Dγa yiwen deg-sent deqs n warazen n usebγes.
Γaf akken iγ d-yenna umedyaz Said Abbas, yessarem d akken yibbas a d-yesuffeγ 2 n tesfifin-is akk d yiwen n wedlis n wammud n yisefra.
Γer tagara, Said yefraḥ aṭas s temliliyin icuban tig i(Rreḥba tis 7 n wedlis amaziγ i d-yellan itemdint n Tubiret), akken yefraḥ daγen s Weγmis n Yimaziγen win akken yesnarnayen yal ass di ccan n yedles amaziγ.
Islam Bessaci