Imi ara temɣumbas, ad neṭṭef abrid, cceṭ cceṭ n lebḥar, di sin. Aman , ttemɛebbaren d ubeḥri n tmeddit, acṛuf yul-it wadal, ṣṣut n lɣaci yeɛmer taddart n At Ṛebbi, igerfiwen sluɣen igenni amidadi, ilawlawen n wulawen rran-d ṣṣut deg wedrar. Din ad d-teswawi am ass-nni amezwaru, s timmi fiḥel imi, seg wul, s wecmumeḥ d nneyya icebbḥen udmawen ineggin d sser: “ Yya ma ad tedduḍ, as-naf abrid I leqrar?” Taddart n At Ṛebbi, yal tikelt deg-I ara nerzu ɣur-s, nettduqqus-d, yettaki-d lebɣi n wul, lebɣi n tudert d liser, yettak-id kra din d aḥulfu i ɣ-izedɣen. Iḥder-d wass I deg ara d-nɛawed talalit, a nessibnen lewqat xas yerna yiwen wass, ɣer wussan-nni… Ass-a d amxalef, ad nḍegger tamuɣli-nneɣ akin I tlisa n lebḥer. Ad nekkes ɣef wul, ad nessiɣ tiftilin tizeggaɣin ɣef ttnaṣfa n yiḍ, ad neččaṛ axxam n lfeṛḥ: yemlal wass d yiḍ!
Tagella d lmelḥ, ur txeddeɛ ara, d cwiṭ kan n lemḥibba I trennu. Ad necnu taɣect I tlalit taneggarut. As-nini “yirbeḥ” i kra n wayen yeṛṛzen, ad nesfillet I lxiṛ, am imezwura-nneɣ. Dɣa din ad d-mmektiɣ tismin-nni ttasmeɣ, tettaɣ tmes deg-I, yal imi ara tili gar ifassen-is: D tamellalt, tettirriq, tettili yid-s yal imi ara yemlil d yiman-is, ɛzizet am tiṭ-is, tcennu-yas-d taɣect n tilin yal imi d-isuḍ waḍu n leḥzen, aḍu n temẓi yennesren gar ifassen-is. Ṣṣut-is am uwaqur, icennu tayri. Ad nebru I tismin, ad d-nuɣal ɣer taddart n At Ṛebbi, imenna-tt wul d timezgit, deg-s kan I tesɛa sser temlilit.
Zira