Iwakken ad rren talast i tmes i d-ihubben si yal tama deg wussan-a, iɣallen n laman n Bechloul bedden ɣer tama n yimezdaɣ iwakken ad beɛden fell-asen lemḍerra, imi times ur tebɛid ara ɣef yixxamen di kra n yimukan. Di la Crête-Rouge, imi aṭas n tnezduɣin i iqerben ɣer tezgi, yekker wah ruḥu deg yimdanen i yugaden ad d-taweḍ ɣer ɣur-sen. Segmi i ssawlen i yimjuhad-a n tmes, ur ɛeṭṭlen ara iwakken ad d-awḍen tameddit n wass iwakken ad kecmen tizgi mebla akukru. D ayen i ten-yeǧǧan qqimen almi qrib ad yedden lmeɣreb iwakken ad nnejmiɛen. D acu kan, azal n yiwet n tsaɛet seg lfaḍur akkin, ajajiḥ n tmes yuɣal-d akken yella, d ayen yeǧǧan imezdaɣ ad ssiwlen i tikkelt-nniḍen i yiɣallen-a iwakken ad d-uɣalen. Am wakken i weɛden imdanen, uɣalen-d almi d amkan amezwaru, anda mɛawanen nutni d yimezdaɣ iwakken ad ssensen times lewhi n uzgen n yiḍ. Azekka-nni, imi times tecɛel-d seg tama nniḍen, uɣalen-d yiɣallen-a n usellek dima ɣer taddart-a anda i qqimen almi qrib ad yali wass.si tama-nsen, wid yeskelfen s tzegwa, ur ten-tezgil ara lmeḥna-a n tmes, imi ɣas akken ur sɛin ara ttawilat iwulmen i teswiɛin tecban ti, maca ur d-qqimen ara mebɛid i twaɣit-a. Ulamma d azɣal, iɛessasen-a n tezgi n tɣiwant n Ɛǧiba qublen ajajiḥ n tmes s tebɣest. Ma d srabes n tɣiwant, lmir s timmad-is yella yakan ɣer tama n yimezdaɣ yegla yid-s akamyun yessawaḍen aman. Iwulem ad d-nesmekti dakken times i d-yezzin tikkelt-a i temnaḍt-a n La Crête-Rouge d tin ur nessashel ara cɣel ama i yiɣallen n usellek neɣ iɛessasen n teẓgi, imi ur llin kra n yiberdan i seg ara ɛeddin. D ayen yeǧǧan dɣa ikemyunen n yiɣallen n usellek ad qqimen berra i tezgi ttrattabaɛen lḥif s wallen.
S. M.