Akkin i wuguren d-yellan akk ɣef teɣzi n wayyur remḍan-a yezrin, ma ilaq ad d-nesmekti, iɣeblan n leɣla n wemɛic, agezzum n trisiti, aman s tmiqwa, ssmayem d times…Ayen d-ijebden lwelha, ugar, asegas-a, ar tama n tfaskiwin d tmeɣriwin d-yettilin di Bgayet ilmend n wayyur remḍan, d iqdicen-nniḍen yugten deg tudrin is-d-yezzin i temdint-a. Wissen ma s lemɛanda neɣ amek kan, aṭas n tudrin id yeswejden timliliyin n ddabex uḍar deg yiḍ(tournois en nocturne), ɣef teɣzi n wuḍan n remḍan. Aqdic-a, ur yelli d ayen i sehlen, maca ad tan-yennulfa-d damaynut deg tudrin n Leqbayel, imi aṭas n tudrin tura id t-ixeddmen ɣas akken ccɣel-is meqqer, rnu ɣur-s uguren-nni d-nebder s ufella, acu kan lebɣi d tebɣest n yilmezyen ulac is izemren.
Taddart n Bumlal, d yiwet gar tudrin-a id-yessumren yiwen wahil d ameqqran ilmend n wayyur remḍan, seg wass-nni wiss sin almi d ass imensi n Lɛid amezyan 2012. Ma drus, 16 n trebbaɛ n ddabex uḍar deg talɣuɣa n yilmezyen akk d 5 n trebbaɛ i talɣuɣa n yimezyanen, iswi yiwen, aqesser d unecraḥ, ɣas akken yuɣ lḥal tazla ɣef teqbuct n taggara teḍḥa-d teḥres, d aṭas!
Mačči d leqdic amenzu ara d-heyyi taddart n Bumlal, imi tuɣal deg laɛwayed-is, ass-a, tilin deg w annar, yal tikelt, s ufus n umussu aduklan-ines. Krad(3) n tdukliwin n wadal CSBC, tadukla tadelsant Asirem Umaziɣ d tdukla n twennaṭ Izenzaren akk d lemɛawna n tejmaɛt yimɣren n taddart, imezdaɣ s umata d tɣiwant c Cemmini n At Weɣlis, yes-sen i tessaweḍ tkemmel ahil-ines ilmend n remḍan, taddart n Bumlal. Ar tama n wuraren-a, tella-d tulya n uxxam n yilmezyen n Bumlal, ɣas akken mačči s wudem unṣib, acukan axxam-a yegla-d s waṭas n lfayda i yimezdaɣ n Bumlal, imi ten-yejmaɛ deg yiḍ, din i tetten lqahwa, ay ttaɣen tiɣawsiwin-nsen akken daɣ erran tiṭ ɣef wuraren n ddabex d yettilin deffir kan n uxxam-a yilmeẓyen. Mi kfan wuraren, ufrarent-d snat trebbaɛ ara yawwin tiqbucin ilmend n timiliyin n taggara, imeẓyanen d yilmeẓyen, amussu n tdukliwin n taddart n Bumlal yekfa ayyur remḍan s yiwet n tmeɣra meqqren, anda wwint trebbaɛ ifazen arazen-nsent meqqren, d tefka tkebbanit “Trader line” d mass Lefrik S. Sin akkin tkemmel tmeɣra s ccna d taḍsa almi d taggara. Aṭas, seg wid nesseqsa, nnan-aɣ-d d akken :”ayyur remḍan iɛedda amzun d yiwen w ass”. Aya ihi, yebɣa ad d-yini belli d ahilen d ttawilat-a imaynuten d ttheyyin yiɛeggal n tdukkliwin i yeǧǧan imezdaɣ, sumata, ur frizen ara akter n wiyiḍ teɣzi n wayyur remḍan d yiɣeblan-is.
Samir At Buɛza