Akli Khermane d yiwen umeɣnas n tugdut id illulen deg Tawrirt Mussa ( At Dwala) 49 issagasen aya, iḥamel tamurt –is, yella deg umusu adelsan amaziɣ deg issagasen n tmanyin uqbel ad yemeɣnes deg ukabar n FFS seg imi id tella tulya ɣef tuget n yikabaren deg assegas n 1989. Akli yella diɣ d yiwen i-iqedcen aṭas deg umusu n leɛrac id illulen di lhejna n tafsut taberkant di 2001. Amek i d- tamuɣli-s ɣef ayen id iḍerun di tmurt akked ukabar n FFS, amek yettwali imal , amek ilaq ad tili taɣarmanit d timsal i nesqerdec yid-s deg tadiwenit agi .
Amek i d tamuɣli n Wakli ɣef liḥala tettidir timeti-nneɣ, wis ma mazal-itt tefka anzi ɣer tin akken yettawi asmi yebda abrid n timeɣnest ?
Nekk ɣef akken meyzeɣ tugdut ɣef id nettmeslay tella kan d aɣebar s allen, imi di tillawt werǧin tella. Adabu inuda ɣef isufar s wacu ara yerasi iẓuran-is, yesnulfa-d asget n yikabaren ( tuget n yiwen) mebla talaba n tugdut. Maca ur ilaq ara neffer belli di zedwa n yimir ( 1989) nnuman belli tidet tulya n tewura ɣer tilleli d ttin wuɣur neṣawed menbeɛd iseflan n Ṭuber 1988. Tura feqqeɣ belli lliɣ d nniya , nettwakalex wakali. Matoub yesefra-tt-id deg awal-is asmi id yenna « win iɛerḍen tacriḥṭ n tsekurt ur iqeneɛ ara » . Akud ur t-yeskedeb ara imi akken ila nettwali adabu yesenta tucar-is i lebda di lawan deg agdud yuffa-d iman-is yettweɛzel meṛṛa ɣef timsal id at- yecqan !
Ass-a tuget n iɣermaniyen sḥisifen ɣef liḥala dwuɣur tecceg tmurt, amek i d anamek n unect-a ?
Liḥala n tmurt « lleh ibarek » akken qqaren , tuẓ ɣer deffir. Agdud yeluẓ, yenḥaf. Ay ahruḥu ula d claḍa tuɣal tettnuz s 200DA ! Simmal zerrin wussan simmal yettmuɣbun waɣref . Ddel isuma-t-id si yal tama. Kra yellan yenqedwa. Leɛrur sijhiden simmal tiḥajurin-nsen, xaḍen-tt tirni ur ǧǧin kra. Ixeclawen n lfetna ttirifigen di tignawt… wissen s wacu ara d yeglu uzekka !
Akabar n FFS ( wuɣur tettikiḍ)yettidir icerigen werǧin yemuger yekka uqbel… amek i d- tamuɣli-k ɣef taluft-agi ?
Imi id tudreḍ taluft-agi, ɣlaben-iyi imaṭṭawen acku lliɣ seg wid yumnen s tikta n tirni n iɣalen inemlayen. Nefka temẓi –nneɣ d asfel i ukabar agi.LLiɣ seg yimenza i yeddan di llem–is, ttikiɣ di tumɣa ines deg At Dwala. Zik nella nettwali tikta n ukabar am ubeḥri di turet. Mača( di tagara-agi) nukid ɣef yir liḥala. Nuffa iman-nneɣ nexnunes deg yir arukti. Ur bɣiɣ ara ad qejmeɣ neɣ ad awteɣ maɛni tidet ulamek ara ttenɣum. Ass-a akabar n FFS ( degmi s yetteka di tafranin iɛedden) ibedel aglim. Ur fhimeɣ ara d acu i d- iswi sɛan yimdebran yeṭṭfan zmam n ukabar di lawan-a. Teḍra yid-nneɣ, nekni s yimeɣnasen, am win yegren deg qadus n tulest ur iban melmi neɣ anda-t yixef-is amer tafat ad teflali. Nekk ɣef akken walleɣ ma iqedem-itt akka, akabar n FFS la yeqqa z aẓekka ines . Nnig waya ma yella yeɣba ukabar-agi xas inni i tugdut di tmurt : ar tufat !
amurt n leqbayel tettwakbel si yal tama, amek i d- ixef-is ?
Ɣef akken wallaɣ waqila di tmurt n Leqbayel kfan at tisas ! Takriḍ akked lxuf izedɣen leḥwari, tikerḍiwin, leqela n laman ɣef ayeg ur d inabeh ḥedd yesewham. Aya yewwid ad negg tuttra : « anda-t lɛez d nnif si nettzuxu nekni s Leqbayel ? Anda akka id -as nebra i yiseɣ-nneɣ ? Yekfa uḥazeb ? ». Aqleɣ am widen yeɛyan am akken id -as yenna Muhya : « zemem , qemem » ! Ass-a ( segmi uɣalen xemsa ɣef yimi) s terzeg ara d nnini belli iruḥ kulci . Yedda sser, yekfa laman d uḥazeb , yeqwa lefsed, tejla tezdeg ! Win tufid yettmani kan ad yeǧǧ tamurt. Ilmeẓyen ur as- asen iban wara, imal-nsen yettwergel. Ula d imeḍqan anda ara ksen kra ɣef lxaṭar ulac-iten. Leɛwayed n Leqbayel simmal fettin-t deg urɣu n uzulal. Amenuɣ ɣef timadit-nneɣ yerra aḍar. Lḥaṣun mebla ma nesuget awal ad nnini kan : « tamurt n Leqbayel ass-a tesewḥac » !
Acu i d-ddwa n taluft ?
Tifrat d taddukli . Ala netta-t ara aɣ- yesmenɛen. Ma mazal tiqit n ṣṣwab, i wakken a nqazem icqiriwen yellan tewwid a nnili am yiwen, tewwid ad nekk nnig timurṣaḍ yellan ger isertiyen, tewwid a nner tamurt n Leqbayel nnig yal leḥsab akken at id nesukes deg uɛzal deg tella. Ma yella ur neḍfir ara abrid-a xas inni tedez tebrez tebqa aɛla xir ay Akbu !
Times la tlheb tirni deg tizgwa-nneɣ, acu n tiɣri ara d tegred i wid teɛna taluft( imdebren)akked Leqbayel ɣef anect-a ?
Nesɛa cwit uzzemur bɣan at qucen ! Times iḥuzan tamnaḍt –nneɣ tafka anamek ɣer timenɣiwt, ilaq at id nnini ! Nettḥulfu am wakken llan wid yebɣen ad rran tamḍat-agi d lqifar. Bɣan a tannez, a teknu, as yeffeɣ wadif n tudert. Ilaq a nẓer belli wid yellan deffir n times-agi d icenga n tmurt, ur sɛin ara isem nniḍen !
Awal n tagara ?
Tanemmirt i waɣmis –nwen ! Tiɣiri-inu d ttin ibanen : « taddukli… taddukli…taddukli. » Am akken id as yenna Matoub : « d lwajeb asirem ad yilli xasakka lweɛd i teqqes » !
Ait Slimane Hamid