Tamdint n Tubiret tettbeddil udem seg wass ɣer wiyaḍ ilmend n usnerni deg lebni n tnezduɣin d usewjed n yimukan i lecɣal yemgaraden. Ma nebder-d amraḥ i usenzi n waṭas n ttawilat ur nezmir ad nerr tiṭ tama n ugafa sanda rezzun yal ass d imeyyaten n yimdanen. Wagi d ssuq i yeldi nnig n useggas-aya Issad Rebrab. Ɣer tama n waya, rennun-d yisensa. S tidet, tamdint n Tubiret txus deg uḥric-a n yisensa, imi sin akken yellan ttbanen-d drus ɣef leḥsab n wid i d-irezzun ɣur-s. D ayen yeǧǧan ass-a, sin n yisensa ara yeldin tiwwura-nsen akka ɣer zdat. Ma d aḥric n wučči, yal tikkelt d asnerni deg uḥric-a. Ma nerra tama n « la cité Ouest », ad naf gar sin n yiseččuyen yella yiwen n usečču. Mačči kan dagi i yellan s waṭas, maca ulac tiɣmert ideg ur d-nettmagar ara imukan yecban wi. Deg wussan-a yezrin, d yiwen n usečču s wazal i yeldin tiwwura-s di temdint n Tubiret. Réda, imi d netta i d imḍebber n usenfar-a, yessexdem ttawilat ara yeǧǧen win ara yerzun ɣur-s ur ineddem ara, balak ahat d ayen ara t-yeǧǧen ad yettuɣal ɣer ɣur-s. Liseɛ, d trusi n yizumal icudden ɣer yidles-nneɣ yerna-d cbaḥa i umkan-a, d ayen ara yeǧǧen amezdaɣ n Tubiret ur yettnekmir ara ma yerza-d ɣur-s uberrani iwakken ad t-yessečč ɣer Réda. Mačči kan d amkan weḥdes ara iɛeǧben imẓuren, maca, ula d afus n win yesswwayen irennu-d azal i umkan-a. Akka, limer nettemɛanad akka s ayen yelhan…
S. M.