Ass-nni n lǧemɛa yezrin, tella-d temlilit taɣelnawt tamezwarut n waddal n tikli deg udrar, di Bgayet. Azal n 50 inaddalen n ṣenf-a id yemlalen deg temnaḍt n Titi n Berber, akken ad alin adrar Iɣil Awis id yezgan nig tamnaḍt-a n Tizi n Berber, deg wazal n 8 tsaɛtin d tikli nebla aḥebbus. Timlilit-a tessewejed-itt-id tesqamut tazayrit i waddal n udfel d waddalen n idurar. Ar tama n tikli-ya, yella-d, daɣ, yiwen usarag ɣef waddalen n udrar, tawennaḍt d umerreḥ i deg ḥeḍren inaddalen yekkin d waṭas n yimezdaɣ. Asarag i deg yezzi wawal ɣef wamek ara yennerni waddal-a, ad yettwassen ugar deg tmurt-nneɣ. Akken daɣ yezzi wawal ɣef twennaḍt, s-ɣur imḍebren n tenmehla n twennaḍt, amerreḥ d useḥbiber ɣef teẓgi, d akken timlilit-a ilaq ad tili d tin ara yessakin imdanen ɣef waddalen-a, acukan, taluft tagejdant d aseḥbiber ɣef ccbaḥa, lhawa d tizegzewt id tettak tiẓgi.
Ad tan ihi, abrid yeldi i wid/tid yebɣan acali deg udrar, ɣas ma ar imsdurar aya yella deg tudert-nsen n yal ass, acukan tamuɣli d ttawilat ur kif-kif ara !
Samir At Buɛza