Yiwen wass bu ufekrun akk d tmeṭṭut-is bdan qqazen di lqaεa ufan sin ifranken, ttemcawaren acu ara d-aγen, msefhamen γef ddewwara, si mi itt-id-yewwi bu ufekrun, inna-yas i tmeṭṭut-is:-A taεzizt mi tebbwa ddewwara-agi ma tebγiḍ ečč-itt akk, maca eğğ-iyi kan takerciwt acku nekkini ala tinna iḥemmleγ.
Mi tebbwa, tameṭṭut tečča takerciwt-nni meṛṛa, ah i texdem!
Bu ufekrun: A tameṭṭut awi-d takerciwt-nni.
Tameṭṭut:-Tečča-tt tugi.
Bu ufekrun:-A tugi teččiḍ takerciwt?
Tugi:-A mmi berraγ.
Tameṭṭut:-Ala d tiflewt.
Tiflewt:-A mmi berraγ.
Argaz:-Acimi a tameṭṭut, tuγaleḍ d taseqqaḍt ? Yuγal iwwet-itt s ubeqqa.
Tameṭṭut terwel tugi ad tuγal s axxam. Iqqim bu ufekrun ittru, ibγa a tt-id-iger i lεemeṛ-is.
Tεedda-d tsekkurt tenna-yas:-Acimi tettruḍ a bu ufekrun?
Bu ufekrun:-Fkiγ-as abeqqa terwel-iyi γer bu xemsa.
Tasekkurt:-Ur ttaggwad a k-tt-id-rreγ.
Truḥ tsekkurt tesṭebṭub γer uqeṛmud n tmeṭṭut.
Tameṭṭut:-Telbiba wa telbiba, anwa wagi γef uxxam n baba ur yugwad, ur ikukra, a Ṛebbi gzem-as aḍar s umenqaṛ neγ s umencaṛ.
Tasekkurt:-D nnana-m tasekkurt ccbaḥa n tmurt.
Tameṭṭut:-Lukan d nanna tasekkurt d ccbaḥa n tmurt, ur kem-ikkat ara useggad am igzem tamzurt. Tasekkurt tuγal-d tettru tenneḥcam.
Bu ufekrun mazal ittru, iεedda-d uzger is-teqsa-t:-Acu akka yuγen Bu ufekrun si mkul cedda ?
Bu ufekrun:-Fkiγ-as abeqqa terwel γer bu xemsa.
Azger:-Ur ttagwad a k-tt-id-rreγ.
Iruḥ uzger isqerqub γef uxxam n tmeṭṭut. Tameṭṭut:-Telbiba wa telbiba, anwa wagi γef uxxam n baba ur yugwad ur ikukra a Ṛebbi gezm-as aḍar s umenqaṛ neγ s umencaṛ?
Azger:-D ddada-m azger ikerzen lḥemra.
Tameṭṭut:-Lukan d azger ikerzen lḥemra ur tkerzeḍ ara si ṣṣbeḥ ar tmeddit a k-id-awin d tuna. Yuγal uzger ittru inneḥcam.
Iqqim bu ufekrun di mkul cedda mazal-it ittru, iεedda-d isγi isteqsa-t, kif kif.
Tameṭṭut:-Telbiba wa telbiba, anwa wagi γef uxxam n baba ur yuggad, ur ikukra, a Ṛebbi gezm-as aḍar s umenqaṛ neγ s umencaṛ?
Isγi:-D ddada-m isγi id-ikkan si Mekka.
Tameṭṭut:-Lukan d isγi d-ikkan si Mekka ur tettnaḍid ara deg ugudu wis ma a ttafeḍ tawekka. Yuγal-d isγi ittru inneḥcam.
Iqqim bu ufekrun ittru armi id-iεedda uzrem, inna-yas:-Acu akka i k-yuγen a bu ufekrun si mkul cedda yal ass di imeṭṭi ?
Bu ufekrun:-Fkiγ-as abeqqa terwel γer bu xemsa.
Azrem:-Ur ttagwad a k-tt-id-rreγ.
Bu ufekrun:-Annaγ ay azrem ur ccukeγ ara aṭas ig ruḥen ur d-qḍin.
Azrem:-Rğu ad d-twaliḍ.
Iruḥ uzrem ikcem γer tmeṭṭut inna-yas:-Ulac telbiba, ulac axxam n baba-m, lḥu γiwel neγ a kem-qseγ seg timiḍt-im.
Dγa tameṭṭut twala mačči d urar tega-yas udem i uzrem n bu tsiqest, tuγal-d γer bu ufekrun.
Yahia Yanes