Urnezmir ara daɣen ad nenkeṛ, iǧeṛnanen i d-ilulen deg yiseggasen iɛeddan, ladɣa iseggasen n tmanyin d tesɛin deg tallit ideg yeǧhed umennuɣ ɣef tneṣlit tamaziɣt di tmurt n Lezzayer. Meḥsub iǧeṛnanen-a i d-ssufɣent tjmuyaɛ n yelmeẓyen i iqeddcen di tallit-nni ama deg umennuɣ ɣef tneṣlit tamaziɣt neɣ deg usekfel n tmeslayt akked leɛwayed. Wid yettarun deg-sen ur llin ara akk-nsen d imesǧeṛnanen. Yerna tuget n wayen i d-ttarun d laṛyuy icudden ɣer liḥala n tmurt, d usenqed n wayen i ixeddem leḥkem, neɣ taswiɛin ttarun-d ɣef temsal icudden ɣer tmeslayt tamaziɣt d leɛwayed tiqdimin. Iǧeṛnanen-a i d-ilulen s lexṣaṣ n ttawilat, ur d-llethan ara s waṭas s tira n lexbaṛat ugar n wayen i d-llethan d temsal n umennuɣ aseyyasi neɣ ɣef tneṣlit akked tmeslayt; yerna ur ddiren ara aṭas n lweqt. Ula d imezdaɣ n tmurt n Leqbayel i ten-id-yettaɣen, mačči akken ad ɛelmen s wayen yeḍṛan, meɛna ttaɣen-ten s tin n nnif akked d liḥsas s lwaǧeb n usaned n umennuɣ ɣef lḥuquq n yimezdaɣ akked tmeslayt d tneṣlit tamaziɣt. D lmital, ad nebder dagi cchada i aɣ-d-yefka Ḥakim Ṣaḥeb yellan d yiwen seg yemḍebbṛen n uǧeṛnan “Asalu” i d-yettefɣen deg yiseggasen n tesɛin, netta daɣen yella yettaru deg-s ; atan wayen i aɣ-d-yenna: ”Asmi i d-nessufuɣ aǧeṛnan Asalu, nekni neznuzay-it s xemsemya(t) fṛantk di tallit-nni, yebbas lliɣ d nekk i yetkelfen s uznuzay-is d ufṛaq-is deg lbiru n l’RCD n temdint n Lezzayer, atan yusa-d yiwen n umɣar yefka-yi-d ɛecṛalaf, nekk mebla ma xemmeɣ ɛeddaɣ ad as-d-fkeɣ yiwen n uǧeṛnan yerna ad as-d-rreɣ ṣṣeṛf. Netta iḥbes-iyi yenna-d: ur yi-d-ttarra ara ṣṣeṛf, efk-iyi-d akkit ɛecrin, yiwen i nekk, wiyaḍ ad ten-feṛṛqeɣ i medden ad ɣṛen”. S cchada-ya ad nefhem belli iǧeṛnen-a imezwura ur mmugen ara akken ad d-fken lexbaṛat neɣ ad sɛelmen imezdaɣ s wayen yeḍṛan di tmurt neɣ di dunnit. Meɛna mmugen akken ad snernin deg-sen leḥraṛa ɣef umennuɣ, ɣef tneṣlit d tmeslayt tamaziɣt d lḥuquq n yizzayriyen i yettwaɛefsen s yiḍaṛṛen n leḥkem n tallit-nni.
Meḥsub iǧeṛnanen-a d taseddaṛt ideg ttafen tagnit wid iqeddcen di ssiyasa akken ad zerrɛen lfekrat-nsen d yixemmimen-nsen. Imdanen daɣen ttaɣen-ten s tin n nnif d liḥsas s lwaǧeb, ma d ticki bɣan ad ẓṛen acu yeḍṛan di tmurt neɣ di dunnit, qqaṛen iǧeṛnanen i d-yettefɣen kul ass, ama d wid n taɛṛabt neɣ d wid n tefṛansist. Yuɣ lḥal wigi yuran s teqbaylit, ttefɣen-d ama tikkelt deg waggur neɣ abrid i dduṛt, neɣ tikwal.
Mokrane Chikhi
yrttkemmil