Qarren wat zik yiwen ilemẓi yuli s adrar i wakken ad iẓur xali-s i izedγen di taddart. Xali-s-agi d bab n lmal ikseb abeqri d uγelmi irna tamurt tizemrin, timeγrusin ; ittusemma d amerkanṭi, mi iwweḍ yaf-n xali-s deg yiwet n tegnitt am wakken ur isεi ula d lqidar imensi, llebsa idlen tafekka-s yal tafawett s tfawett ula d tezdeg ur zeddiget ara, awah mačči d ayen i γef ara issusem inṭeq γer-s :-A xali?
Xali-s:-Acu?
Aggaw-is:-Annaγ a xali ssεaya imudd-ak Ṛebbi, Llah ibarek maca d acu-tt akk liḥala-agi, aql-ik a d-tettbaneḍ d kečč id aεeṭṭar akk amezwaru di taddart.
Xali-s:-Ih, a mmi nuggad ad aγ-teḍru, ddunit teddewwir.
Meḥsub yuggad ad kfun isurdiyen ad yuγal d igellil.
Aggaw-is:-Awah a xali ay akken ibγu tḍewwer ddunit, ay akken tebγu teḍru-yak, ur k-tessawaḍ ara akka i tebbwḍed.
Yahia Yanes