Tamedyezt d yiwen n wuddem deg waṭas n wudmawen n tsekla s umata, imi nettat s timmad-is tebḍa ɣef waṭas d aɣanib, ama deg wayen yellan d aqbur, neɣ deg umaynut. Imedyazen d at wawal yettmuruden gar yifyar, yettnernin gar usefru d gma-s, yettdaddacen gar imeyyaten n yisental akked temsal deg ddunit s lekmal-is. Tikwal s tazzla i d-tettcercur tmedyezt gar yiles d yinɣi, tikwal-nniḍen, ur tetteffeɣ ara deg yimi alarma ɣeẓẓant tuɣmas kra din d asekkil, ɣas tamedyezt temgarad gar umedyaz d wayeḍ, gar lǧens d wayeḍ, am wakken yemgarad yidles gar-asen, tezga d tin yessezdayen awal d wawal akken ad kmumsen deg tikti n umdan d umezruy-is, tezga d tin yessizdigen allaɣ d wul n walsi.
Ma nebren-d tiṭ ɣer tmedyezt taqbaylit, s waṭas n leqder ara d-yaru yimru ayen yellan gar tuccar n uḍris-a. Leqbayel xtaren ad szegren awal seg zzman ɣer wayeḍ s yimi wala tira, dɣa din i yefruri wawal s waṭas ɣer wid i t-yettawin ttaran-t. Asefru yettidir yal ass deg yal tamsalt ɣer tmetti taqbaylit taqburt, awal yeččur d sswab akked tifrat. Gar tgejda n tmedyezt taqburt, yella Si Muḥend U Mḥend, Si Lbacir Amellaḥ, Yusef U Qasi d wid-nniḍen. Seg wass-nni ɣer wass-a tamedyezt taqbaylit tger acḥal d aqudim ɣer ccbaḥa, tamussni, asnulfu, d waṭas n temsal timaynutin, mebla ccek tifaskiwin n tmedyezt i d-yettilin deg yal tamnaḍt n Tmurt n Leqbayel d tid yesnernan ccan d wazal n tmedyezt, imi imedyazen n wass-a glan-d s waṭas n tiktiwin ama deg talɣa, ama deg unamek, neɣ deg uɣanib, meḥsub d lawan akken ad walin yimussnawen n tesdawit, acu akka i d-ssefrurxen yimedyazen, am wakken d lawan ad teffeɣ tmedyezt-a ɣer wid ara tt-yeɣren.
Deg tfaska i d-yellan ussan-a deg Tizi Wezzu (deg uxxam n yidles Mulud Mɛemri), gar 02 ɣer 06 wember 2012, i d-heyyant snat n tdukliwin, Si Muḥend U Mḥend akked Yusef U Qasi, nemlal d yiɛeggalen n tseqqamut n uskazal n yisefra, gar-asen Ḥasen Ḥelwan, Ḥamid At Sliman, Salem Ɛemran, Nurdin At Sliman akked Umsedrar. D timlilit s yiwen n ucmumeḥ aɣezzfan ɣef yimawen-nsen, imi nutni gezmen-tt deg rray dakken tamedyezt n tikkelt-a tger asurif werǧin tger. Deg tama n yimedyazen d Busaɛd Akli (Kiki) i d-iḥellan arraz amezwaru s umkan aḥeqqani, syin akin d Salima Dali akked Salim Benxlifa i d-yeṭṭafaren s warraz wis sin akked wis tlata. Ula d tasuqqilt tesɛa amkan-is deg temsizzelt s waṭas n yisefra akked yiḍrisen i d-rran yimekkiyen ɣer teqbaylit seg tutlayin-nniḍen, ihi arraz n tsuqqilt iḥella-t-id Musa Salmi. Lḥasun xussen kan warrazen, wama wid akk yellan din uklalen, xersum d asnemmer ɣef leqdic-nsen deg tutlayt yuklalen azal aṭuqtan.
Salim Benkhelifa