Timetti taqbaylit d tin i yettwasnen aṭas s yidles-is d umezruy-is, tettwassen diγen s tsekla-s. Ma yella tasekla tamensayt taqbaylit d tin i yellan d timawit kan, yerna tiwsatin-is d tid i yerzan anagar tamedyezt, timucuha, inzan d temseεraq; maca ass-a, tlul-d yiwet n tsekka-nniḍen n tsekla, ta d tin i wumi neqqar tasekla yuran, tasekla-ya tamaynut tegla-d s tlalit n tewsatin-nniḍen : ungal d tullist (le roman et la nouvelle); d tiwsatin i yellan akk deg tsekliwin n umaḍal, maca deg tsekla taqbaylit, alarmi d aseggas n 1981, i d-yeffeγ wungal amezwaru s teqbaylit.
Xas ulamma, aẓar n wungal n teqbaylit yettuγal γer yiseggasen n 1940, asmi i yura Belɛid At Ʃli ungal-is “Lwali n udrar” i d-ssuffγen yimrabḍen irumiyen deg useggas n 1946, maca ungal amezwaru n teqbaylit i d-yeffγen s talγa n wungal s wudem aḥeqqi d “Faffa” i yura Racid Ʃellic, yeffeγ-d deg useggas n 1981; deg useggas n 1983, yerna-d ungal-nniḍen i wumi isemma “Asfel», deg useggas-nni kan, Saɛid Saɛdi yessuffeγ-d ula d netta ungal-is i wumi isemma “Askuti”.
Seg wass-n, uγalen yal aseggas ttefγen-d yidlisen-nniḍen s tmaziγt, ama d ungalen, ama d tullisin, ama d ammuden n tmedyezt neγ d ayen-nniḍen, yuγal udlis amaziγ yeṭṭef amḍiq-is gar yidlisen yuran s tutlayin-nniḍen, ama deg tnedlisin, deg temkarḍiyin, neγ deg temziknin, ula deg tfaska tagraγlant n udlis azzayri (SILA), yewwi-d amḍiq-is, acku yettnuzu akken i ilaq, imi ṭṭuqten yimeγriyen, d ayen i yeffkan afud i wid i yettarun s tmaziγt, akken ad arun, yerna ad d-sneεten tiktiwin-nsen deg yidlisen, d acu kan tajmilt tameqqrant diγen ad tuγal i teẓrigin i d-yessufuγen idlisen-a.
Seg wungalen « Faffa » (1981), « Asfel » (1983), n Racid Σellic, « Iḍ d wass » (1990), « Tagrest urγu » (2000) n Ʃmer Mezdad, ar “Yugar ucerrig tafawet” n Ḥmed Nekkar; “Salas d Nuja” n Brahim Tazaγart d waṭas n wungalen-nniḍen.
Ussan-a yezrin, ffγen-d sin n wungalen imaynuten: “Am ẓẓebra gar yifḍisen” i yura Ḥmed Nekkar, akk d “Inig aneggaru” (2012) n Brahim Tazaγart; seg ucrurd γer tikli, mazal lxir ar sdat, imyura ṭṭuqten, awi-d kan wid ara yeγren.
Larbi Yahioun