Nenwa d ayen fukkent tefranin, yekfa meddeḥ d uberreḥ, ad ddun lecɣal. Meɛna teɣreq targit, simmal teddun wussan, simmal yettzad wurrif. Acimi ?
Kra anda akk tella tkerrist, i tt-iferrun d asaḍuf. Aneggaru-a, d win i iberzen tiswiɛin. Lameɛna, ticki ara yili usaḍuf yekseb tili, liḥala tettemxebbal, tettemcebbal yetteɛraq ccedd i uyeddid. Amek ihi, tikkelt-a, deg tefranin yezrin, asaḍuf i d-yefɣen deg uɣmis unṣib n 14 si yennayer 2012 yegguma ad yefru taluft n usebded n uselway n tɣiwant. Deg yixf wis 80 n lqanun-a, ad naf belli aselway, di tazwara, ad d-yebded seg lejrida i d-iḥellan nnig n uzgen n wid ifernen. Ma yella ulac, d lejridat i d-yewwin nnig n 35% n leswat ara d-ibedden s afran daxel n tesqamut n tɣiwant. Akken, ma yella ulac lejrida i d-yewwin nnig waya, ad sɛun akk wiyaḍ azref iwakken ad d-bedden s afran. Ma yella ulac win i d-yufraren, ad yili ufran wis sin di 48 n tsaɛtin i d-iteddun. Ula ma yella ulac win i d-yewwin aṭas n leswat, d win meẓẓiyen di leɛmer ara d-yalin. Tura, ma nebɣa ad nezder asqerdec deg usaḍuf-a, ad naf belli yettmeslay-d ɣef lejridat yejban i 50% d tid yesɛan ddaw n 35%. Aɣbel ameqran i yellan tura, mi ara tili lejrida tewwi-d nnig n 35%, tiyaḍ akk ddaw. Ayadra, amek i yezmer ad yili lḥal ɣef usebded n uselway n tɣiwant ?
Lḥir yezdeɣ imdanen seg yiḍ n ubeggen n yigemmaḍ n tefranin, ṭṭuqten yisallen ur nebni ɣef tidet, tekcem tiḥraymit imdanen. Ṭṭmeɛ yuɣ aẓar, almi tewweḍ win i d-ihellan yiwen n ukersi yebɣa ad yuɣal d aselway n tɣiwant zdat wid yessawḍen ɣer 6 neɣ ɣer 7.
D tagnit daɣ ara yeldin tabburt ahat i usawem, ad d-yezzi wawal-nni n « ckara » yuzlen di tefranin n 10 di maggu iɛeddan.
Am wakken daɣ i izad lkerh deg yimdanen, almi tuɣal taluft teffeɣ i unnar n tsertit. S ya ɣer da ad nsel i temsalt n nnif, n teɛrucit, n tṣeffit…Lḥasun, d asaḍuf ideg ur ufin ara yimdanen iman-nsen, imi aṭas n tili i t-ikeblen.
S. M