Tasqamut n taddart n Aɛerbi i d- yezgan deg tɣiwant n Iflisen n lebḥer d tin i yessawḍen ad tebnu yiwen n uxxam n yilmeẓyen. Segmi ur d-yelli ara ujerred n usenfar-a deg tɣiwant, kkren yimezdaɣ n taddart-a ɣer lebni n uxxam-a i ttrajun yilmeẓyen s ccuq. Ɣas ulamma ur d-tewjid ara tedrimt iwulmen i waya, At taddart d wid i ibedden ɣer yidis n yiɛeggalen n tesqamut, imi ssawḍen yal wa s wacu iwumi yezmer, i usewjed n yisufar n lebni.Si tama-s, lwilaya n Tizi Wezzu tefka-d yiwet n lemɛawna s lqidar n 60 n yimelyunen n ssantim. Temɣer n uxxam-a yewḍen ɣer 200m2 yersen deg wakal n taddart bdan lecɣal deg useggas n 2003, maca s tebɣest d ufus n tallelt n yimezdaɣ yessaweḍ di taggara-a ad kfun deg-s lecɣal. D yiwet n tiddukkla tadelsant i tesbedd taddart ara yesseddun leqdic deg uxxam-a.
D. I .