Tiddukla unegmu d usnarni n lḥirfat (ADPAL) n lwilaya n Tizi-Wezzu, s lemεawna n tγiwant n Wizgan d texxamt n lḥirfat d ṣenεat tiqburin n lwilaya n Tizi-Wezzu, sudsent-d ussan ukewwen γef amek id-yettili usufeγ n uguglu naγ afarmağ n tfunast akk d lyaεurt, i yebdan s wudem unṣib ddurt yezrin ass n 07 almi d 12 tudber, γef teγzi n 06 n wussan. Tamesbanit-agi yesduritt-id wexxam n yedles Ferrat Remḍan n tγiwant n Wizgan, anda i yukkan nnig n 250 n yemdanen, ger-asen ifellaḥen d yinelmaden id-yussan si temnaḍin d lwilayat yemgaraden n tmurt, am Tizi-Wezzu, Tubiret, Bgayet, Bumerdes, Lzzayer tamanaγt, Blida, akken ad-lemden amek id-tettili lxedma n uguglu n tfunast s ttawilat iqburen, ilfayda n yemdanen-agi xarsum ilmeẓyen yebγan ad-kecmen deg aḥric-agi usufeγ n lγella-agi. Timsirin ttakent-tt-id snat n tmusnawin n tmurt n Fransa tamnaḍt n Auvergne, i ittewxeṣen deg aḥric-agi usufeγ n uguglu tigi d Massa Anne Marrie akk d Massa Véronique, anda id-ffkant iwellihen iwulmen, γef usuffeγ n lγella-agi d lfayda yesεa i tezmert n wemdan d tadamsa n tmurt, d tikci n tebγest i yemdanen yebγan ad-xelqen tikebbaniyin timecṭaḥ. leqdic d win iεeddan di tegnatin yelhan aṭas anda id-yella tikci n yigardasen n tagara n wulmud.
Islam Bessaci