Yiwen ilemẓi ibγa ad yerr lxiṛ i baba-s, inṭeq inna-as:
-A baba aṭṭas i tεettbeḍ fell-i, tura bγiγ a k-rreγ lxiṛ-ik, mel-yi acu i tebγiḍ?
Baba-s: -A mmi ma s tidett tebγiḍ ad id-terreḍ lxiṛ i k-xedmeγ awi-yi γer tiγilt n leflantiya, rnu aγ-iyi-d snat n tetteffaḥin.
Mmi-s: -D ayagi a baba, d ayen isehlen.
Ihi ibbub baba-s γer tiγilt-nni i s-d-icṛeḍ iwwi-as-d titteffaḥin-nni, asmi i t-issaweḍ, baba-s mi id-iddem yiwet n tettefaḥt ad istaεmel teγli-as-d, dγa mmi-s-nni ad iṣṣub arma d asif ukessar a s-tt-id-yawi, akken armi azal n xemsa tikal, aqcic yaεya iffeγ-d yiles-is, inṭeq γer baba-s : -Annaγ a baba! di tebγiḍ ad teččeḍ tattefaḥt ala di tiγilt-agi?
Baba-s icmumeḥ, irra-as: -A mmi asmi it-mecṭṭuḥeḍ wwiγ-k-id γer dagi tetturareḍ ticirett ihi kul mi ara k-tegrireb ad subbeγ a k-tt-id-rreγ arma taεyiḍ kečč nekk mazal, awi-d kan ad d-tecmumḥeḍ, ass-a kečč tsubbeḍ xemsa tikal taεyiḍ.
Ihi a mmi ur tezmireḍ ara ad terreḍ lxiṛ i yimawlan-ik d awezγi, d acu kan lxiṛ ilha win i t-ixddmen.
Iqar Ccix Muḥend U Lḥusin:
Lxiṛ aṭṭas seg-s d ṣṣwab,
Cceṛ cwiṭ seg-s d lefsad.
Yahia Yanes