Amḍiq-a amezwaru i d-tewwi tdukli tanaddalt USAL n wat Leɛziz i useggas n 2012, yella-d mbeɛd mi d-ufrarent tlata n trebbaɛ n yimeẓyanen yetturanen deg tdukli s yigemmaḍ-nsent ɣef uswir n lwilaya n Tubiret : Tarbaɛt yetturaren deg usmil « juniors » d terbaɛt yetturaren deg usmil « minimes » s lmendad n usleɣmay mass Rachid Bouras, snat-a n trebbaɛ ṭṭfent amḍiq amezwaru ; Tarbaɛt yetturaren deg usmil n « les cadets », i d-yezgan deg umḍiq wis tlata. Ɣef akken i aɣ-d-yemmeslay mass Karim Hannache, yellan d yiwen seg yimḍebbṛen n tdukli USAL : « Arrac-a i d-yewwin igemmaḍ igerrzen i terbaɛt-nneɣ, sɛan akk-nsen aswir ifazen, aya daɣen yella-d ilmend n leɛtab akked lǧehd n usleɣmay-nsen mass Rachid Bouras i ixeddmen seg ul-is ». Ger daɣen n wid iqeddcen ilmend n usenerni n tdukli USAL, Ɛemmi Ssaɛid, netta d asleɣmay n terbaɛt n usmil n «les cadets » i d-yewwin amḍiq wis tlata. Ɛemmi Ssaɛid, Netta d yiwen n wudem yesɛan azal ɣer yiɛeggalen n tdukli d yakk ilmeẓyen n tɣiwant nat Leɛziz imi aṭas i d-yefka i tdukli USAL d waddal s umata di temnaḍt-agi ; ladɣa imi netta d amazzag(spécialiste) deg uḥric n waddal, rnu ɣur-s yella seg yimyuraren iqdimen n terbaɛt USAL. Mass Karim Hannache, netta daɣen qbel ad yili d yiwen seg yimḍebbṛen n tdukli USAL, yella seg yimyuraren ifazen n terbaɛt i iḥemmel s waṭas uzayez, rnu ɣur-s d netta i d asleɣmay n terbaɛt n usmil « minimes » i d-yewwin amḍiq amezwaru i useggas n 2012. Iswi-ines ɣef wakken i aɣ-d-yenna ; yettmenni ad d-yefk ayen akk yesɛa d tazmert d tmusni akken kan tadukli USAL ad teqqim di tqacuct. Aya akk d assirem ɣas ma ttawilat xuṣṣen s waṭas di temnaḍt-a yeṭṭuṛfan, ladɣa ɣef temsalt-a mass K .Hannache yenna : « Nessutur seg yimḍebbṛen n tɣiwant nat Leɛziz ad ggen leqṛaṛ i yilmeẓyen axaṭer d nutni kan i d lsas ; d amedya arrac-agi-nneɣ i d-yufraren, limer ad ten-ɛiwnen ad xedmen igemmaḍ yugaren aya iɣer nessaweḍ s lqella n ttawilat ». Akken ad nesmekti, tarbaɛt n usmil « juniors » i d-yewwin amḍiq amezwaru, tufrar-d sennig n trebbaɛ timeqqṛanin nniḍen, yecban : El Asnam, Djebahia, Kadiria d Taghzouit. Ma d assirem n tdukli USAL i useggas n 2013 ara ilalen, d talɣuɣa n tkurt n uḍaṛ n lwilaya n Tubiret.
Mokrane Chikh