Axxam n tfellaḥt n lwilaya n Bgayet d tenmehla n tfellaḥt swejden i sin n wussan ɣef wamek ara yili asnerni n uyefki n tfunast deg tmurt-nneɣ. Timlilit tis snat yeḍran deg uxxam n yidlesTaos Amrouche, tesdukkel-d aṭas seg wid terza temsalt-a n uyefki. Ama d wid yettrebbin lmal i uyefki, ama d wid d-ixeddmen ayefki, ama d imusnawen n yisafaren wučči, ḥulfan s lixsas n temliliyin am ti imi akka i nezmer ad nseddu aḥric-a. Timsikniyin deg berra n uxxam n yidles, mlant-d amek ilaq arebbi n tsita i uyefki imi yemgarrad urebbi d tid-nniḍen, daɣen d acu ilaqen i ujmaɛ akken ɣas iɛeṭṭel ur yewwiḍ uyefki ɣer lluzin, ur yettwaɣay ara, atg. Γer daxel n uxxam, llan aṭas n yisaragen ɣef wazal n uyefki n tfunast deg tudert n umdan, ɣef wamek ara tɛiwen lḥukuma wid yebɣan ad xedmen lmal, atg. Aṭas n wid teɛna temsalt i d-yerzan ɣer uxxam n yidles Taos Amrouche, nnan-d amer ad ttilin wussan am wi imi d ayen i yettḥuzun amdan deg tudert-is n yal ass. Racid seg Sidi Ɛic, yettrebbi lmal seg wasmi i d-yecfa, yenna-d : “ayefki yewweḍ ɣer 25 idinaren i tcekkart s lemɛawna n ddula. Ur ilaq ad nettkel s lemɛiwnat n lḥukuma, ad nettkel ɣef yiman-nneɣ. Zik, ulac ttawil, ayefki yella imi ulac win ur nettrebbi lmal deg uxxam. D acu ara yeǧǧen ass-a wid mazal deg tuddar, ur xeddmen lmal ?”
D. I.