Ugur amuqran di tmetti d lqella n ttṛebga, acku d nettat i d asalas alemmas, acḥal d yiwen ad tafeḍ iγra maca ur tezmireḍ ad tawiḍ yid-s ula d amecwar wezzilen, i mi ḥedd ur ifhim ur ittuṛebba, d ayen nettidir. Ikka-d waya si sebbat imxalafen, llaẓ sεeddan yimawlan di lewqat izrin yal yiwen anida t-iẓrez. Illa walebεad isεedda lḥif icfa fell-as irra-t d taγuri, illa wayeḍ irra-t d tajhuli.
Γef waya newwi-d yiwet n tmacahutt deg umedya-agi.
Illa yiwen urgaz, yal ass ihedder i warraw-is: -A tarwa ur illi kra d-ittasen kan akka, ilaq ad tilim d irgazen.
A d-tenṭeq yemma-tsen: – A tenan d irgazen.
Argaz: -Win illan d argaz ur iggan ara alamma d lweqt n yimekli maca d netta id-ittṣewwiren ayen akken ara yečč, nekni zik neṛwa laεtab nectaq aγrum.
Tameṭṭut: -Ihi tura! nutni ifka-d unyir-nsen .
Argaz: -A tameṭṭut, anyir ur d-ittak ara alamma tefkiḍ-as, aql-i ṛwiγ laεtab, mačči d yiwen wass ad asen-nili d ilmendad.
Tameṭṭut: -Awlidi d anyir-nsen id-ifkan, di laεnaya-k anef-asen i warrac.
Yal ass akken, armi d tikkelt argaz izεef nezzeh, iggul ar d asen-yefk tamsirt i seg ara fhemen.
Iddem lekwaγeḍ-is inna-asen: – Lḥaṣul aql-i ad ruḥeγ γer yinig.
Iruḥ akken εeddan kra wussan ibda llaẓ d lḥif γef uxxam la d-iγelli, ayen akken akk wulfen ulac-it, imiren fehmen belli d baba-tsen i ittγummun ixejḍan n wuguren n ddunit, argaz iqqim ibγa ad jeṛṛben acḥal teswa lxedma.
Asmi id-yuγal, qublen-t akk s imeṭṭawen, yal yiwen acu i s-ittcetki, tenṭeq tmeṭṭut-is: -Annaγ ay argaz teğğiḍ arraw-ik i cceṛ ur d-tennulfaḍ fell-aγ.
Argaz: -Nnaγ asmi ruḥeγ d anyir-iw kan i bbwiγ wama anyir-nsen γur-sen i iqqim, acimi ur sen-d-ifki ara? Neγ tura waqila d anyir-iw id-ittaken. Ssarameγ kan ad yili tfehmem tamsirt-agi.
Yahia Yanes