Xemsa n yiseggasen mebεed album ‘’La France des couleurs’’ n ucenny ameqqran Idir, ass n 4 deg fuṛar-agi i d-iteddun ad d-yeffeγ umaynut-is. Deg album-agi llant 12 n tezlatin ma nsedda-d acewwiq-nni. Tizlit tamezwarut yesseqdec deg uẓawan tizimmarin-nni n tama n Wat Yanni. Tizlit anda i d-yesmektay yiwen n urgaz i wumi qqaren Said U Lamara. Yeqqar-as :’’ A Saεid U laεmara a bu snat n tjellabin, deg yiwet llan yizurar ma d tayeḍ d timengucin, yefka yiwet i yilmeẓyen, yefreq tayeḍ i telmeẓyin, a Saεid U Laεmara.’’ Yal tikelt s wacu ččurent tjellabin-agi, netta iferreq deg-sent. Azwel n tis snat ‘’Adrar inu’’. Da, d ccuq n tmurt : ‘’ γas d iṭij yerγan, neγ d adfel yessan, γas d aẓru yeḥfan, ḥemmleγ-k ay adrar inu.’’ Di tayeḍ anda i as-yettmeslay i yelli-s, yeεreḍ ad yefsi tiyersi-nni tiεewwiqt n leεwayed i yettilin gar teqcict d uqcic, ama nettat d gma-s neγ gar win i tḥemmel d yimawlan-is. Yeqqar-as :’’a yelli εzizen am tassa, ur as-qqar yif-ikem gma-m. Win tebγiḍ ma yebγa-kem, mmel-as ul i yessaram. Γer yuγ-i sehlit lecγal, awi-d kan ad am-yekkes ṭṭlam.’’ Yelli-s, dγa, tecna-d s tṛumit deg yiwet n tezlit. Ma d tiyaḍ, yesmekta-d ussan di tmurt n leqbayel, ladγa di ccetwa akked tmucaha, yerra tajmilt i yemma-s i yemmuten ilendi. Am wakken i d-yessekcem tibuγaren deg yiwet n tezlit. Album yemxalaf γef win akken iεeddan imi dagi d Idir kan i yecnan, ma nekkes tibuγarin-nni akked d tizlit n yelli-s.
Akken qqaren, ayen yelhan, yelha, Idir d Idir. Yella-d unadi ama deg uẓawan ama deg wawalen. D ayen ara yernun ccan, mebla ccek, i ccna aqbayli s umata.
Asmuzget igerrzen.
Hocine. M