Ihegga-t-id i lǧamaɛ
Baba-s yesseḥfeḍ-as leqran
Yella d aqcic ameẓyan
Ur nettidir deg listaɛ
Awal yuɣ-it i yimawlan
D ixeddim kan i t-yegman
Deg Lezzayer i yella nnfeɛ
Dinna yexdem d axeddam
Akka i d Crif Xeddam
D ddunnit yexdem ddreɛ
Dda Crif
Yennuɣ d lḥif
S tezmilt n uẓawan
Yexdem d axeddam n ufus
D aɣrib deg tmurt n Fransa
Taẓuri deg-s i tensa
Ayen d-as-yexdem drus
Tefrawes-as acḥal tasa
Isfel akkin i tlisa
Ccna-nneɣ, yekkes-as ammus
Asurdi-s tečča-t Tuydayt
Aẓawan d aman yeswa-t
Asnulfu ɣur-s fessus
Dda Crif
Yennuɣ d lḥif
S tezmilt n uẓawan
Yelmed lsas n uẓawan
Yessuli ccan n teqbaylit
Seg tafrara-s ɣer tmeddit
« Lemri-s » d win i ɣ-d-yeẓran
Win d-immuger iɛawen-it
S imal yelhan isegger-it
Ɣur-s yejbed-d iɣeblan
Tazmert teṭṭef s yiwen uẓar
Yekrez i yekrez uzger
Tura s yisem-is i ttgallan
Dda Crif
Yennuɣ d lḥif
S tezmilt n uẓawan
Isem-is yettwanas itran
(…)
Malek HOUD
Awal yecceḍ
Tasusmi tesbur tignawt
Lebḥar yeṣṣeḍ
Iṭeqqir adrar s lmujat
Leḥzen yuwweḍ
Iεedda si yal taddart
Yemmut Sliman
Sliɣ la ttrunt lxalat
Nuɣnin yefrax
S laḥzen ila cennun
Aqwir isax
Teqqur tugga i d- yettḥudun
Lḥerz yefsex
Ljerḥ anwa a t- iseḥlun
Yemmut Sliman
Irgazen ar daxel iten-run
Nesewhem lḥal
D acu-t lqum am agi
N εemmed i lmuḥal
Di tkerkas la nettikki
D acu d-mazal
S yisaɣ aqlaɣ nettseḍḥi
Yammut Sliman
Am akken kra ur yeḍri
Agni Gaɣran
Ass-a yezzem araw-is
Ayen yeḍran
Yekuker ad t -iḥḥer s wallen-is
Yesber dayen
Amer ad yesber ṣṣebr-is
Yemmut Sliman
Ur yenṭil deg akkal- is
Tizi d yiṭij
Tafat-nsen d tazugaɣt
Segren-d irij
Yekkes leḥjab i lmeḥnat
D zzman uεwij
Yefkan ssif i tderɣalt
Yemmut Sliman
(…)
Hamid Ait Slimane