Taɣiwant n Draɛ Ben Xedda i d- yezgan ɣef 10 kilumitr deg umalu n temdint n Tizi wezzu tesfaydi-d s yiwet n tedrimt s wazal- is lqidar n 19 imelyaren n ssantim. Ɣas tadrimt d tin meqren, maca uguren i tettidir temnaḍt-a d win yekkan nnig waya, imi di tazwara yettunefk ad d-yili ubeddel i wudem n temdint, rnu ɣer-s aheggi n tlata n yinurar i warrac imeẓyanen di Xlili, Maḥmudi d 400 n tmezduɣin. Am wakken daɣ, yetturaju usefreg n tmeqbert n tlemmast n temdint d ureqqeɛ n uxxam n tɣiwant iwumi ur tettuɛawed ara sbiɣa seg yiseggasen n 80. Aɛiwed n leblan n usiweḍ d yiwen n uḥric iwumi tettuhegga tedrimt s wazal n tlata n yimelyaren, ayen ara yessefsessen tamdint yezgan texneq seg tkeryas. Ma d tamkerḍit, 100 n yimelyunen n ssantim i as-yettwaheggan iwakken ad kfun deg-s lecɣal. Aḥric n tjara d win yellan akka di lban n yimḍebbren imi azal n 30 n yimelyunen n ssantim ttwahheggan akka i uɛiwed n sqef n yiwen n ssuq, aya, d ayen ara yesneɣsen si tjara deg yiberdan.
Dalila I.