Amacahu ad yelhu
Zik-nni imezwura
Ttidiren deg tayri
Irden tazart d nniyya
Nnif ṣṣwab tirrugza
Ulac akk ayen n diri
Seg teɣzi-s ɣer tehri
Ttemṣawaben s wawal
Awal, i s-fkan d azal
Amacahu…
Yiwen wass d merra ussan
S leqseḥ yewwet-d ugeffur
Tidet treẓ deg uzagur
Lekteb d leḥrir i s-d-ssan
Udem-nni i d-yegla zur
Yewwi-as-d acḥal d amur
Lḥif yekbel imawlan
Amacahu…
Wissen ma ad yelhu?
Ur neẓri anda tetteddu
Iḍaq wul n yimawlan
Tugdudt wissen anda i tgureb
Agdud meskin yegrareb
Ur tufiḍ d acu i s-d-iggran
Amur meqqran yesleb
Win d-iggran ha-t yeddebdeb
Yedder tudert n waklan
Amacahu!
Wissen ma ad telhu?
Yefka iman-is i waman
Yeɛreḍ ad yezger akkin
Yettargu tireḍbanin
Taggara ččan-t yiselman
Amacahu!
S yis-s i yeẓẓaẓen wakud
Ilemẓi yefka times
Tewwa akk tfekka-ines
Yiwen, meskin ur t-iḥudd
Amacahu!
Tilelli assen akken i tgureb
Yerɣa waffad n ugdud
Imeṭṭawen, ẓẓdiḥ d rrɛud
Tagnit tugi ad d-terḍeb
Amacahu!
Bɣan akk ad tt-id-rren
Iṭij, ad d-iwali tamurt
Tuɣal-d akken tsekkurt
Ur d-terri tilelli yeččḥen
Amacahu!
Igdaḍ merra nneḥcamen
Uɣalen-d ur tt-id-rrin
Yekker-d yiwen ur t-nessin
Yebges s tebɣest n yizmawen
Yenna-as i tlelli:
“Nekk i d ɛeẓẓi bel ɛeẓẓi
Tazlagt n Utunsi
Zwir-d sadat-i
Neɣ tadebbuzt ad d-teḥlelli!”
Terr-as-d tlelli s tugdi:
“Ad ngeḥḥel
Ad nẓewwel
Ad nezwir sdat Sidi”
Malek Houd