«Ɣur-i, tamurt mebla anaẓur, d tamurt tewwi lmut, ihi ssarameɣ nella gar wid yeddren» M’hamed Issiakhem
Tikkelt-a mačči am tiyiḍ, targit i d-yerzan ɣer Targa Uzemmur (Tasdawit n Bgayet) d tin yessan s ssbiɣat n taklut, ama d tid n Issiakhem, ama d tid n Zahia Kaci i d-yeddmen tamusni-s srid ɣef yifasen n Issiakhem am ufrux i ileqḍen lḥeb deg wuran n bab-is. Ɣef waya tenna deg wawal-is « Issiakhem, mačči kan d anaẓur deg tuklut, maca d anaẓur ula deg tudert-is n yal ass».
Tajmilt i as-rran yinelmaden n Bgayet i Issiakhem tella-d s lmendad n Umezday Adelsan Imnayen. Ddurt ma drus, gar 25 furar alarmi d 04 meɣres, tegla-d s waṭas n leqdicat yecban tamsikent n tuklut i d-ijebbden allen am ddkir, isura ɣef tudert n unaẓur ameqqran Issiakhem, asarag n Zahia Kaci akked Zohra Djazouli, dɣa massa Djazouli tessen aṭas Kateb Yacine, ɣef waya i d-temmekta ussan yettcercuren d iḥulfan ɣef temẓi-s yeqqen zzman ɣer tẓuri, ama n Kateb, ama n Issiakhem. Mebla ccek, inelmaden n tesdawit akked yinebgawen i d-yettasen sya u sya, ferḥen d axettar ɣef leqdic amerkanti, am wakken i dhan s yiwet n temsizzelt umi heyyan arraz i win ara d-yufraren s tuklut-is deg umkan amezwaru. Ula d amezgun ur yettwattu ara deg tegnatin yecban ti, imi tikkelt-a s tceqquft (Le maestro). Syin akkin tella-d tmenna n tmedyezt anda i d-nesla i « Muḥ prend ta valise ». Seg tama-nniḍen iɛeggalen n Umezday adelsan Imnayen lhan-d d wufraq n yiwen n uɣmis umi semman «Awal n unelmad» i d-heyyan ɣef demma n unaẓur ameqqran Issiakhem anda aṭas n yinelmaden ffkan-d tamuɣli-nsen ɣef tẓuri s umata. Lḥasun ameslay yezzi ɣef waṭas n yinaẓuren n tmurt-nneɣ, gar-asen Issiakhem, Kateb Yacine, Zahia Kaci, Zohra Djazouli, Khadda, Tahar Djaout, Baya, Mesli d waṭas-nniḍen.
I taggara n ddurt-a yessan tadwat yedlen taẓuri, d Rabah INASLIYEN ara d-yilin di ttiɛad i wass-a n letnayen 04 meɣres, deg yiwet n tmeɣra tameqqrant ara yilin deg usensu n Targa Uzemmur. Ula d Dda Rabah yekki deg tejmilt i as-yuɣalen i M’hamed Issiakhem. Akka, s wudem n ucmumeḥ akked tẓuri, inelmaden n tesdawit n Bgayet rran tajmilt i yiwet n tgejdit tameqqrant deg umezruy n tẓuri.
Salim Benkhelifa