Agguren-agi ineggura, ṭṭuqtent twaculin yessuturen di temdint n Tizi Uzzu. Di yal tama n yiberdan imeqqranen, ad naf teẓẓel twacult deg-s la tessutur, ladγa tiwaculin n ’’yiminigen’’ : Nijer, Mali d Suriya mebla ma nettu tiwaculin tizzayriyin yellan yakan si zik. Teṣbiḥ neγ taktabt n leqran deg yiwen ufus, deg wayeḍ ad naf taḍebsit i yidrimen. Ababat d tyemmat ad d-fessren arraw-nsen am sselεa, ur d-cliεen la deg urγu n unebdu-nni, wala deg ugris n usemmiḍ-agi. Awi-d kan tadrimt, d aya i d iswi-nsen ; awi-d kan ad ssergagin iḥulfan n yimdanen. Ula d timetti tedda di lεeb-nsen. Mačči d lemεawna i dir, meεna d yir tannumi i asen-snaγen armi i asen-tuγal tmetrit d lxedma. Σlaḥsab n yikumirsiyen uγur ttawin ṣṣerf i d-ttḥellin, llan wid i d-yettṣerrifen ugar n 3 n yimelyan deg wass, ladγa, Isuriyen-nni yettmetran deg ubrid aγelnaw.
Xas ulamma dduwla texdem-asen ttawilat anda ara ttilin, meεna nutni ugin-ten. Γef wakken i d-qqaren yimusnawen n tnefsit, timetrit-agi tessegray-d tawaγit tameqqrant γef yigerdan-nni imecṭaḥ. Nnan-d d akken asmi ara imγuren, ad d-rren ttar di tmetti i ten-yeğğan deg ubrid ur ssinen lḥamu n uxxam. Akka, dγa, i ttawin yir abrid deg tudert-nsen. Yerna cγel am wa, yuγal d lewrata γer twaculin tizzayriyin : akka ara naf taqcict-nni swayes ssuturen, yakan, tura mi akka meqqret ciṭ, tuγal d nettat i yeṭṭfen amekkan n wid i tt-id-yettawin zik. Aṭas deg-sen i yesεan ttawilat imeqqranen, meεna ugin ad ğğen aya. Akken i as-qqaren ‘’ansi iεedda uγerda n leflas, yeddbeε-it gma-s’’ neγ ‘’Yessers uḥeddad afḍis, yerfed-it mmi-s’’
Ha-t-an waqila, Nijir teḍleb-d di Lezzayer i wakken ad tejmeε arraw-is. Seg wassmi ay slan, dγa, bdan la ttbeddilen imekwan…
Hocine.M