Gar tlawin i yumnen dakken izerfan n tmeṭṭut d amennuγ n yal ass mačči kan d tameγra n uzgen n wass deg useggas, tella Massa A. Ahmed Said, tanemhalt deg uγerbaz amenzu deg temdint n Tizi Uzzu.
Nemlal-itt deg umahil-is, s lferḥ d ameqqran i aγ-d-terra γef kra n yisteqsiyen i yeεnan ass agraγlan n tmeṭṭut, ha-ten-in :
D acu-t 8 deg meγres γur-m ?
Massa Ahmed Said : 8 deg meγres d ass sur necbi wiyaḍ, d ass i budden i tmeṭṭut. Tameṭṭut-agi tebḍa d leṣnaf : d tayemmat, d tameṭṭut n urgaz, d taqcict, d yelli. Tesεa azal d agejdan deg tmetti akked twacult, teṭṭef amḍiq s wazal-is deg lxedma n berra.
Dγa γef lxedma-agi n berra d uxxam, amek i tt-tettsellikemt ? tbeḍḍuḍ iman-im γef snat ?
Mačči kan γef snat, tikwal ilaq ad nuγal d irgazen akked tlawin deg yiwen ubrid. Ladγa deg wayen yeεnan ttrebga n warrac d wayen akk i d-iceddun γer twacult : nettεawan s yidrimen, deg leqraya n imecṭaḥ, nettelli-asen-d i lmendad.
Meqqar yella win i akem-yettεawanen deg usewwi ? Argaz-im neγ arraw-im ?
Ahbuh a mmi. Tameṭṭut tettağğa deg lḥeqq-is, deg lweqt n usteεfu ines i wakken ad tidir twacult-is deg talwit akked liser. Yerna deg taggara teẓram amek !!! Mačči kan ass i ilaqen i tmeṭṭut, laqen 365 n wussan.
Xas akka, llan wid i as-yeqqaren bezzaf n tlelli i sεant.
D tidet, llan wid yusmen s wayen i d-tḥella tmeṭṭut. Iεdawen n tudert-agi akken i asen-yeqqar Matoub, sḥissifen imi i d-tekker tmeṭṭut tettnadi γef yizerfan-is. Γef wakken fehmen i yiman nsen ddin, amekkan n tmeṭṭut d axxam. Ttun tigrawliyin i d-tefka tmurt n Lezzayer, nezmer ad d-nader : Dihia, Hassiba Benbouali, Fadma n Soumer, Nabila Djahnine( d tameγnast) akked tiyaḍ.
Awal aneggaru
Tameṭṭut ara asen-teqqar : ayen i d-nḥella, ur t-nettarra ara. Tanemmirt n Uγmis n Yimaziγen. Tameγra tameggazt i tselmadtin n uγerbaz Mimoun.
Hocine. M